Pushpa 2 Shooting : ఐకాన్ స్టార్ అల్లు అర్జున్ నటిస్తున్న పుష్ప-2కు సంబంధించి ఓ ఆసక్తికరమైన విషయం బయటకు వచ్చింది. ఈ సినిమా షూటింగ్లోని కొంత భాగాన్ని ఛత్తీస్గఢ్లోని అడవుల్లో చిత్రీకరణ చేసేందుకు షెడ్యూల్ ఖరారు కాగా.. అక్కడ నక్సలైట్ల భయం ఉండటం వల్ల ఆ షూటింగ్ లోకేషన్ను పక్క రాష్ట్రమైన ఒడిశాలోని అడవుల్లో ప్లాన్ చేశారు మూవీ మేకర్స్.
ముందుజాగ్రత్తగా లొకేషన్ మార్పు!
ముందుగా ఛత్తీస్గడ్లోని సుక్మా అడవుల్లో సినిమా షూటింగ్ షెడ్యూల్ను నిర్ణయించింది పుష్ప-2 చిత్ర బృందం. కానీ అక్కడ నక్సలైట్లు బెడద కారణంగా ముందుజాగ్రత్తగా ఆ నిర్ణయాన్ని నిర్మాతలు వెనక్కి తీసుకున్నట్లు సమాచారం. దీంతో సురక్షితమైన అడవి ప్రాంతంలో చిత్రీకరణ చేసేందుకు మంచి లొకేషన్ స్పాట్ను వెతుకుతున్న క్రమంలో ఒడిశాలోని మల్కన్గిరి అడవులు నచ్చడం వల్ల సినిమా షూటింగ్ స్థలాన్ని అక్కడకు మార్చారు దర్శకనిర్మాతలు. ప్రస్తుతం ఈ అడవుల్లో సినిమా షూటింగ్ ప్రశాంతంగా సాగుతోంది.
ఇందులో తెలంగాణకు చెందిన సుమారు 200 మంది పాల్గొంటున్నారు. షూటింగ్ 20 రోజుల పాటు జరగనుంది. అయితే చిత్రీకరణ జరిగే ప్రాంతం చుట్టూ దట్టమైన అడవులు ఉండడమే కాకుండా నక్సలైట్లు ఎక్కువగా సంచరించే ఛత్తీస్గఢ్ రాష్ట్రం బార్డర్ కావడం వల్ల కట్టుదిట్టమైన భద్రత ఏర్పాట్లను చేసుకుంది చిత్ర యూనిట్. సినిమా సెట్ను రూపొందిస్తారు. ఈ చిత్రానికి సంబంధించిన మరికొన్ని సన్నివేశాలను మల్కన్‌గిరిలోని వివిధ పర్యటక ప్రదేశాల్లో చిత్రీకరిస్తున్నారు.
2022లో వచ్చిన పుష్ప మూవీలోని 'తగ్గేదేలే' డైలాగ్ ఎంతలా పాపులారిటీ సంపాదించిందో ప్రత్యేకంగా చెప్పనక్కర్లేదు. అంతేగాక ఈ సినిమా వివిధ భాషల్లోనూ బ్లాక్బస్టర్ విజయాన్ని సాధించింది. ఇదే ఉత్సాహంతో దీనికి సీక్వెల్గా పుష్ప-2 రాబోతోంది. మొదటి భాగం కంటే దీటుగా సినిమా రెండో భాగాన్ని తెరకెక్కిస్తోంది మూవీ టీమ్.
ఇతర నిర్మాతలనూ..
ఛత్తీస్గఢ్.. బస్తర్ జిల్లాలోని అడవులు సినిమాలకు నెలవుగా ఉండేవి. వీటిని సినిమా షూటింగ్ల కోసం వినియోగిస్తుంటారు. అంతేగాక పర్యటకులకు ఇదొక రిఫ్రెష్మెంట్ స్పాట్గా ఉండేది. కానీ నక్సలైట్ల ప్రభావంతో ఇప్పుడు ఈ ప్రాంతానికి పర్యటకులు రాక కూడా తగ్గింది. మరోవైపు వీరి భయంతో జరగరానిది ఏదైనా జరుగుతుందేమోనన్న కారణంతో ఇతర సినిమాల నిర్మాతలు కూడా ఈ ప్రాంతంలోని షూటింగ్ స్పాట్లను రద్దు చేసుకుంటున్నారట.
బాహుబలినీ వెంటాడింది!
ఆల్ టైమ్ బ్లాక్ బస్టర్గా నిలిచిన బాహుబలి చిత్రాన్ని కూడా ముందుగా దంతేవాడలోని ప్రసిద్ధ జలపాతం హంద్వారాలో తీయాలనుకున్నారు. కానీ నక్సలైట్ల భయంతో ప్రొడక్షన్ టీమ్ ఈ స్పాట్లో షూటింగ్ వద్దనుకుంది. దీంతో సినిమాలోని కొన్ని సీన్స్కు హైదరాబాద్లోని రామోజీ ఫిల్మ్ సిటీ వేదికైంది.
