భారత దేశంలో ప్రస్తుతం ఉన్న 30 మంది ముఖ్యమంత్రుల్లో 29 మంది కోటీశ్వరులే. వీరిలో ఆంధ్రప్రదేశ్ సీఎం వైఎస్ జగన్ మోహన్ రెడ్డి.. రూ.510కోట్లు విలువైన ఆస్తులతో అత్యంత సంపన్నుడిగా నిలిచారు. ఆస్తుల విషయంలో బంగాల్ ముఖ్యమంత్రి మమతా బెనర్జీ చిట్టచివరన ఉన్నారు. ఆమె పేరిట కేవలం 15 లక్షల రూపాయలు విలువైన ఆస్తులు ఉన్నాయి.
అసోసియేషన్ ఫర్ డెమొక్రటిక్ రిఫామ్స్- ఏడీఆర్, నేషనల్ ఎలక్షన్ వాచ్(ఎన్ఈడబ్ల్యూ) అనే సంస్థలు ఈమేరకు ఓ నివేదిక విడుదల చేశాయి. రాష్ట్రాలు, కేంద్ర పాలిత ప్రాంతాల ముఖ్యమంత్రులు.. ఎన్నికల సమయంలో ఇచ్చిన అఫిడవిట్లను విశ్లేషించి ఈ నివేదిక రూపొందించినట్లు ఆయా సంస్థలు తెలిపాయి.
ఏడీఆర్- ఎలక్షన్ వాచ్ నివేదికలోని కీలకాంశాలు..
- భారత్లోని 28 రాష్ట్రాల ముఖ్యమంత్రులు, రెండు కేంద్ర పాలిత ప్రాంతాలు (దిల్లీ, పుదుచ్చేరి) సీఎంల ఆస్తుల విశ్లేషణ. కేంద్ర పాలిత ప్రాంతమైన జమ్ముకశ్మీర్కు ప్రస్తుతం ముఖ్యమంత్రి లేరు.
- 30 మంది ముఖ్యమంత్రుల్లో 97 శాతం.. అంటే 29 మంది కోటీశ్వరులు. ఒక్కో సీఎం సగటు ఆస్తి రూ.33.96కోట్లు.
- ఆంధ్రప్రదేశ్ సీఎం వైఎస్ జగన్ మోహన్ రెడ్డి (రూ.510కోట్లు); అరుణాచల్ ప్రదేశ్ ముఖ్యమంత్రి పెమా ఖండూ (రూ.163 కోట్లు); ఒడిశా సీఎం నవీన్ పట్నాయక్ (రూ.63 కోట్లు).. అత్యంత ఎక్కువ ఆస్తి కలిగిన ముగ్గురు ముఖ్యమంత్రులు.
- బంగాల్ ముఖ్యమంత్రి మమతా బెనర్జీ (రూ.15 లక్షలు); కేరళ సీఎం పినరయి విజయన్ (రూ.కోటి పైన); హరియాణా ముఖ్యమంత్రి మనోహర్ లాల్ ఖట్టర్ (రూ.కోటి పైన).. అతి తక్కువ ఆస్తి కలిగిన ముగ్గురు సీఎంలు.
- 2018 శాసనసభ ఎన్నికల్లో ఇచ్చిన అఫిడవిట్ ప్రకారం.. తెలంగాణ ముఖ్యమంత్రి కె. చంద్రశేఖర రావు ఆస్తి విలువ రూ.23.55కోట్లు.
- బిహార్ ముఖ్యమంత్రి నీతీశ్ కుమార్, దిల్లీ సీఎం అరవింద్ కేజ్రీవాల్ ఆస్తి ఒక్కొక్కరిగా రూ.3 కోట్లకు పైగా ఉంది.
- 2018 శాసన సభ ఎన్నికల్లో ఇచ్చిన అఫిడవిట్ ప్రకారం.. ఉత్తర్ప్రదేశ్ ముఖ్యమంత్రి యోగి ఆదిత్యనాథ్.. ఆస్తి రూ.కోటికుపైగా ఉంది.
- దక్షిణాది రాష్ట్రాల ముఖ్యమంత్రులు ఎం.కె. స్టాలిన్ (తమిళనాడు సీఎం), బసవరాజ్ బొమ్మై (కర్ణాటక సీఎం).. ఒక్కొక్కరికి రూ.8 కోట్లకుపైగా ఆస్తి ఉంది.
- 30 మంది సీఎంలలో 43 శాతం.. అంటే 13 మంది తమపై తీవ్రమైన నేరాల(హత్య, హత్యాయత్నం, కిడ్నాప్, బెదిరింపులు)కు సంబంధించిన కేసులు ఉన్నాయని అఫిడవిట్లలో పేర్కొన్నారు. ఇవన్నీ బెయిల్కు వీలు లేని ఐదేళ్లకన్నా ఎక్కువ శిక్ష పడే కేసులే.
