పాకిస్థాన్ ప్రభుత్వానికి చెందిన ట్విట్టర్ హ్యాండిల్పై భారత్లో నిషేధం పడింది. @GovtofPakistan ఐడీతో ఉన్న వెరిఫైడ్ హ్యాండిల్ను ట్విట్టర్ భారత్లో నిలిపివేసింది. పాక్ ఐడీని ఓపెన్ చేసేందుకు ప్రయత్నిస్తే.. లీగల్ డిమాండ్లకు అనుగుణంగా భారత్లో ఈ ఖాతాను నిలిపివేసినట్లు సందేశం కనిపిస్తోంది. పాకిస్థాన్ ప్రభుత్వ ట్విట్టర్ ఐడీతో పాటు రేడియో పాకిస్థాన్ ట్విట్టర్ సైతం నిషేధానికి గురైంది. @RadioPakistan పేరుతో ఉన్న ఈ ఐడీని ఓపెన్ చేసినా.. అదే సందేశం కనిపిస్తోంది.
బుధవారం బీబీసీ పంజాబీ హ్యాండిల్ను ట్విట్టర్ బ్లాక్ చేసింది. లీగల్ డిమాండ్ల కారణంగా భారత్లో ఆ ఖాతాను నిలిపివేసినట్లు తెలిపింది. అయితే, ఖాతా నిలిపివేయాలని కేంద్ర, రాష్ట్ర ప్రభుత్వాల్లో ఎవరి నుంచి అభ్యర్థన వచ్చిందనే విషయాన్ని ట్విట్టర్ వెల్లడించలేదు. ఖలిస్థానీ అనుకూల నేత అమృత్పాల్ కోసం పోలీసులు ముమ్మరంగా గాలిస్తున్న నేపథ్యంలో ఈ పరిణామం జరగడం చర్చనీయాంశమైంది. నిషేధాన్ని వ్యతిరేకిస్తూ పలువురు ట్వీట్లు చేశారు. 'భగవంత్ మాన్, నరేంద్ర మోదీ.. బీబీసీ నోరు మూయిస్తున్నారు. ప్రజాస్వామ్యాన్ని కాపాడుతున్నామని చెబుతున్నవారే ఇలా చేస్తున్నారు' అని పంజాబ్ కాంగ్రెస్ యూత్ వింగ్ లీడర్ బ్రిందర్ సింగ్ ధిల్లాన్ ధ్వజమెత్తారు. 'ఈ నిషేధానికి మీడియా, న్యాయవ్యవస్థ నుంచి మద్దతు లభిస్తే.. మనం ఏ పార్టీ వ్యవస్థగా మారిపోయినట్టే' అని రాజకీయ విశ్లేషకుడు తెహసీన్ పూనావాలా ట్వీట్ చేశారు. అయితే, బుధవారం సాయంత్రానికే బీబీసీ పంజాబీ ఖాతాను పునరుద్ధరించింది ట్విట్టర్.
ఈ నేపథ్యంలో తాజాగా పాకిస్థాన్ ప్రభుత్వ ఖాతా నిలిచిపోవడం గమనార్హం. అయితే, పాక్ ట్విట్టర్ ఖాతా నిషేధానికి గురి కావడం ఇదే తొలిసారి కాదు. 2022 అక్టోబర్లో ఆ ఖాతాను భారత్లో నిలిపివేశారు. అంతకుముందు పలుమార్లు సైతం ఖాతాపై తాత్కాలిక నిషేధం వేశారు. ట్విట్టర్ మార్గదర్శకాల ప్రకారం కోర్టు ఆదేశాలు, ఇతర లీగల్ డిమాండ్లకు అనుగుణంగా ఈ ఖాతాలను నిలిపివేస్తారు. ఇలా చేస్తే ఆ దేశంలో సంబంధిత ట్విట్టర్ ఖాతా కనిపించదు. ఇతర దేశాల్లో ఆ ఖాతాపై ఎలాంటి ప్రభావం ఉండదు. గతేడాది జూన్లో పాకిస్థాన్ ఎంబసీల ఖాతాలను ట్విట్టర్ బ్లాక్ చేసింది. లీగల్ డిమాండ్లకు అనుగుణంగా.. ఐరాస, టర్కీ, ఇరాన్, ఈజిప్ట్లలో పనిచేసే పాక్ ఎంబసీల ఖాతాలను నిలిపివేసింది.
2022 ఆగస్టులో భారత సమాచార ప్రసార శాఖ.. పాక్ యూట్యూబ్ ఛానళ్లపై నిషేధం విధించింది. పాక్ నుంచి పనిచేస్తున్న 8 యూట్యూబ్ ఛానళ్లు, ఓ ఫేస్బుక్ అకౌంట్ను నిషేధిస్తూ ప్రకటన జారీ చేసింది. భారత వ్యతిరేక, తప్పుడు సమాచారం వ్యాప్తి చేస్తున్న వీటిపై కొరడా ఝుళిపించింది. ఆయా ఛానళ్లు.. నిజమైన టీవీ యాంకర్లు, లోగోలను థంబ్నెయిల్స్గా పెట్టి తప్పుడు వార్తలను వ్యాప్తి చేస్తున్నట్లు భారత ప్రభుత్వం గుర్తించింది. 2021లో తీసుకొచ్చిన ఐటీ నిబంధనల్లోని ఎమర్జెన్సీ అధికారాలను ఉపయోగించి వాటిపై నిషేధం విధిస్తున్నట్లు అప్పట్లో తెలిపింది.
