మధ్యప్రదేశ్ బేతుల్ జిల్లాలో జరిగిన ఘోర రోడ్డు ప్రమాదంలో 11 మంది మరణించగా.. ఒకరు గాయపడ్డారు. ఓ బస్సు, ఎస్యూవీ(టవేరా) ఎదురెదురుగా వచ్చి ఢీకొనడం వల్ల ఈ దుర్ఘటన జరిగింది. మృతులంతా టవేరాలో ప్రయాణిస్తున్నవారే. ప్రమాదానికి గురైన టవేరాలో మొత్తం 12 మంది ఉన్నారు. వీరంతా కూలీలే అని పోలీసులు తెలిపారు.
శుక్రవారం తెల్లవారుజామున 2 గంటలు సమయంలో జిల్లా కేంద్రానికి 36 కిలోమీటర్ల దూరంలో ఉన్న భైన్స్దేహి రహదారిపై.. పరత్వాడా వైపు వెళ్తున్న టవేరా.. బేతుల్వైపు వెళ్తున్న బస్సును ఢీకొట్టింది. ప్రమాద తీవ్రతకు కారు నుజ్జునుజ్జయింది. 11 మంది అక్కడికక్కడే మరణించారు. ఒకరు గాయపడ్డారు. ఈ ప్రమాదంలో ఆరుగురు పురుషులు, ముగ్గురు మహిళలు, ఐదేళ్ల చిన్నారి, ఒక పసిబిడ్డ అక్కడికక్కడే మృతి చెందారని ఎస్సై శివరాజ్ సింగ్ ఠాకూర్ తెలిపారు.
ప్రమాదం జరిగిన వెంటనే స్థానికులు బేతుల్ జిల్లా ఝల్లాల్ పోలీస్ స్టేషన్కు సమాచారం ఇచ్చారు. గాయపడ్డ వ్యక్తిని ఆస్పత్రికి తరలించారు. పోలీసులు, స్థానికులు కలిసి వాహనం నుంచి 7 మృతదేహాలు వెలికితీశారు. మరో 4 మృతదేహాలు కారులో చిక్కుకుపోగా.. కట్టర్ల సాయంతో వాహనాన్ని ముక్కలు చేసి బయటకు తీయాల్సి వచ్చింది. ఎస్యూవీ డ్రైవర్ నిద్రలోకి జారుకోవడమే ఈ పెను విషాదానికి కారణమని పోలీసులు ప్రాథమిక విచారణలో వెల్లడించారు. దీనిపై కేసు నమోదు చేసిన పోలీసులు దర్యాప్తు చేస్తున్నామని తెలిపారు.
ఈ ప్రమాదంపై ప్రధాని నరేంద్ర మోదీ దిగ్భ్రాంతి వ్యక్తం చేశారు. మృతుల కుటుంబాలకు రూ.2లక్షలు పరిహారం ప్రకటించారు.
