కరోనా కట్టడి కోసం 14 రోజులపాటు లాక్డౌన్ విధించింది ఒడిశా ప్రభుత్వం. అయితే.. లాక్డౌన్ సమయంలో నగరాల్లోని వీధి జంతువులకు ఆహారాన్ని అందించేందుకు రూ. 60 లక్షలు మంజూరు చేశారు ఒడిశా సీఎం నవీన్ పట్నాయక్. ఈ మేరకు ముఖ్యమంత్రి సహాయ నిధి(సీఎంఆర్ఎఫ్) నుంచి నిధులను మంజూరు చేసినట్లు సీఎం కార్యాలయం పేర్కొంది.
స్వచ్ఛంద సంస్థల ద్వారా
రాష్ట్రంలోని 48 మున్సిపాలిటీలు, 61 నోటిఫైడ్ ఏరియా కౌన్సిల్స్లోని వీధి కుక్కలు, ఇతర వీధి జంతువులకు స్వచ్ఛంద సంస్థల ద్వారా ఆహారాన్ని అందించనున్నట్లు వెల్లడించింది.
భువనేశ్వర్ మున్సిపల్ కార్పొరేషన్లు రోజుకు రూ. 20వేలు వీధి జంతువుల సంరక్షణ కోసం ఖర్చుచేయాలని ప్రకటనలో తెలిపింది రాష్ట్ర ప్రభుత్వం. నోటిఫైడ్ ఏరియా కౌన్సిల్స్.. రూ. 2 వేలు ఖర్చు చేయాలని పేర్కొంది.
ఇదీ చదవండి : 'స్వీయ జాగ్రత్తలు పాటిస్తే మూడో దశ ముప్పు తక్కువే'
