Kerala Cops Death: పోలీసు క్యాంపునకు సమీపంలోని వరి పొలంలో ఇద్దరు పోలీసులు విగతజీవులుగా కనిపించిన సంఘటన కేరళలోని పాలక్కడ్ జిల్లాలో వెలుగు చూసింది. ముట్టికులంగర పోలీసు క్యాంప్ సమీపంలోనే ఈ ఘటన జరగటం కలకలం సృష్టిస్తోంది. మృతులు క్యాంప్లో విధులు నిర్వర్తిస్తున్న హవిల్దార్లు మోహన్ దాస్, అశోకన్లుగా గుర్తించారు.
బుధవారం రాత్రి నుంచి కనిపించకుండా పోయారని, ఆ సమయంలో వారు విధుల్లో లేరని ఉన్నతాధికారులు తెలిపారు. వారి ఆచూకీ కోసం గాలింపు చేపట్టగా మృతి చెంది కనిపించారని చెప్పారు. మృతదేహాలపై కాలిపోయిన గుర్తులు ఉండటాన్ని చూస్తే విద్యుత్తు షాక్తో మరణించి ఉంటారని ప్రాథమికంగా నిర్ధరణకు వచ్చినట్లు తెలిపారు. మరోవైపు.. చేపలు పట్టేందుకు వ్యవసాయ భూముల్లోకి వెళ్లి ఉంటారని స్థానికులు అనుమానిస్తున్నారు. ఫొరెన్సిక్, పోస్టుమార్టమ్ నివేదికలు వచ్చాకే అసలు కారణం తెలుస్తుందని పోలీసులు తెలిపారు.
కొత్త జంట గొంతుకోసి దారుణ హత్య: ఇటీవలే వివాహం చేసుకున్న ఓ జంటను గొంతు కోసి దారుణంగా హత్య చేసిన ఘటన ఉత్తర్ప్రదేశ్, కాన్పుర్ జిల్లాలో గురువారం జరిగింది. శివమ్ తివారీ(27), అతడి భార్య జూలీ తివారీ(24) బుధవారం రాత్రి వారి గదిలో నిద్రపోయారు. శివమ్ తండ్రి దీపక్ కుమార్, సోదరుడు మోను డాబాపైన పడుకున్నారు. మరో గదిలో అద్దెకున్నవారు సైతం ఉన్నారు. అర్ధరాత్రి శివమ్ గది తలుపులు తెరిచి ఉండటాన్ని గమనించిన అద్దెకుండే వ్యక్తి లోపలికి వెళ్లి చూడగా.. రక్తపు మడుగులో ఇద్దరు పడిపోయి కనిపించారు. దీంతో వెంటనే పోలీసులకు సమాచారం అందించాడు. పదునైన ఆయుధంతో వారి గొంతు కోసినట్లు అదనపు డీసీపీ బ్రజేశ్ శ్రీవాస్తవ తెలిపారు. తెలిసినవారు చేసిన పనిగానే అనుమానిస్తున్నామన్నారు. కేసు నమోదు చేసుకుని దర్యాప్తు చేపట్టినట్లు తెలిపారు. మృతదేహాలను పోస్టుమార్టానికి తరలించినట్లు చెప్పారు.
ఇదీ చూడండి: ఆటో ఎక్కిన బాలిక కిడ్నాప్.. ఆపై డ్రగ్స్ ఇచ్చి సామూహిక అత్యాచారం
