Rahul Bharat Jodo Yatra : కాంగ్రెస్ అగ్రనేత రాహుల్ గాంధీ.. భారత్ జోడో యాత్రను ఎంతో ప్రతిష్టాత్మకంగా చేపడుతున్నారు. ప్రస్తుతం ఈ యాత్ర హరియాణాలో జరుగుతుంది. శనివారం దిల్లీలోకి జోడో యాత్ర ప్రవేశించనుంది. ఈ క్రమంలో మక్కల్ నీది మయ్యం అధ్యక్షుడు, ప్రముఖ నటుడు కమల్ హాసన్ సహా కాంగ్రెస్ ఎంపీలు, స్వాతంత్ర సమరయోధుల కుటుంబీకులు యాత్రలో పాల్గొంటారని పార్టీ వర్గాలు వెల్లడించాయి. ఈ యాత్రలో దాదాపు 50 వేల మంది పాల్గొంటారని దిల్లీ కాంగ్రెస్ చీఫ్ అనిల్ చౌదరి తెలిపారు.
కొద్ది రోజుల క్రితం మక్కల్ నీది మయ్యం పార్టీ పదాధికారుల సమావేశంలో రాహుల్ గాంధీ తనను భారత్ జోడో యాత్రలో పాల్గొనాలని ఆహ్వానించారని కమల్ హాసన్ తెలిపారు. డిసెంబరు 24న యాత్రలో పాల్గొంటానని కమల్ చెప్పారు.
'శనివారం ఉదయం 6 గంటలకు దిల్లీలోని బదర్‌పుర్ సరిహద్దుకు భారత్ జోడో యాత్ర చేరుకుంటుంది. అప్పుడు వివిధ రంగాలకు చెందిన ప్రముఖులు యాత్రలో భాగమవుతారు. అనంతరం భోజన విరామం ఉంటుంది. విరామ సమయంలో రాహుల్ సహా మరికొందరు యాత్రికులు కారులో రాజ్ఘాట్, వీర్ భూమి, శాంతివన్ను సందర్శించి నివాళులర్పిస్తారు. 8 రోజుల విరామం తర్వాత మళ్లీ ప్రారంభమవుతుంది. దిల్లీ నుంచి ఉత్తర్‌ప్రదేశ్‌, హరియాణా, పంజాబ్‌ తర్వాత యాత్ర గమ్యస్థానమైన జమ్ముకశ్మీర్‌కు చేరుకుంటుంది.'
--అనిల్ చౌదరి, దిల్లీ కాంగ్రెస్ చీఫ్
సెప్టెంబరు 7న కన్యాకుమారిలో మొదలైన 'భారత్ జోడో యాత్ర' తమిళనాడుతో పాటు కేరళ, కర్ణాటక, తెలంగాణ, ఆంధ్రప్రదేశ్‌, మహారాష్ట్ర, మధ్యప్రదేశ్‌, రాజస్థాన్ మీదగా సాగి ప్రస్తుతం హరియాణాలో కొనసాగుతోంది. వచ్చే ఏడాది జనవరి చివరి నాటికి కశ్మీర్‌ చేరుకోనుంది.
