Ukraine crisis: ఉక్రెయిన్ నుంచి భారతీయుల తరలింపునకు ఉన్న ఏ ఒక్క అవకాశాన్నీ వదిలిపెట్టట్లేదని స్పష్టం చేశారు ప్రధాని నరేంద్ర మోదీ. భారత దేశం అంతకంతకూ శక్తిమంతంగా మారుతున్నందునే ఈ ప్రక్రియ సాధ్యమవుతోందని చెప్పారు. సైన్యం ధైర్యాన్ని, 'మేక్ ఇన్ ఇండియా'ను శంకించేవారు భారత్ను బలమైన దేశంగా మార్చలేరని ప్రతిపక్షాలనుద్దేశిస్తూ విమర్శించారు. అవినీతిపరులు మళ్లీ బలపడితే.. పేదల సొమ్మును దోచుకుంటారని అన్నారు. మార్చి 7న యూపీలో చివరి విడత ఎన్నికలు జరగనున్న నేపథ్యంలో సోన్భద్ర జిల్లాలో ప్రచార సభలో పాల్గొన్నారు మోదీ.
"ఉక్రెయిన్ నుంచి భారతీయులను రక్షించడానికి భారత్ ప్రాధాన్యమిస్తోంది. ఇందుకోసం 'ఆపరేషన్ గంగ'ను ప్రారంభించాం. పర్యవేక్షణ కోసం నలుగురు మంత్రులను పంపాం. సైన్యం, వాయుసేనను రంగంలోకి దించాం. ఏ ఒక్క అవకాశాన్నీ వదలిపెట్టట్లేదు. భారత్ అభివృద్ధి చెందుతున్నందునే ఇది సాధ్యమవుతోంది. కుటుంబ పాలకులు దేశంలో కరోనా టీకాను, సైన్యం సాహసాలను, మేక్ ఇన్ ఇండియాను పరిహాసం చేశారు. ఇలాంటివారు బలమైన దేశాన్ని తయారు చేయలేరు.'
-ప్రధాని నరేంద్ర మోదీ
భారత సహజ వనరులను గత పాలకులు దుర్వినియోగం చేశారని మోదీ ఆరోపించారు. అయినప్పటికీ స్వదేశంలో ఏ అభివృద్ధి చేయలేదని దుయ్యబట్టారు. సోన్భద్ర జిల్లా ఖనిజ వనరుల్లో కొంత భాగాన్ని ఆ జిల్లా అభివృద్ధికి కేటాయించినట్లు పేర్కొన్నారు. గిరిజన తెగలకు గౌరవప్రదమైన స్థానం కల్పించినట్లు చెప్పారు. గత పాలకులు 10 అటవీ వస్తువులకు మాత్రమే ఎమ్ఎస్పీ కల్పిస్తే.. తాము మాత్రం ఆ సంఖ్యను 90కి పెంచినట్లు స్పష్టం చేశారు.
భారతీయుల తరలింపు ప్రణాళిక ఎక్కడ?
Ukraine Evacuation News: ఉక్రెయిన్ నుంచి భారతీయులను తరలించడానికి ప్రభుత్వం ఏ ప్రణాళికను అనుసరిస్తోందో తెలపాలని కాంగ్రెస్ సీనియర్ నేత రాహుల్ గాంధీ డిమాండ్ చేశారు. 'ఇప్పటివరకు ఎంత మందిని తరలించారు? ఇంకా ఎంత మంది ఉక్రెయిన్లో ఉన్నారు? ప్రాంతాలవారీగా తరలింపు ప్రణాళిక ఏది?' అని ప్రశ్నిస్తూ రాహుల్ ట్వీట్ చేశారు.
ఇదీ చదవండి: 'రష్యా మీదుగా భారతీయుల తరలింపు.. సకాలంలోనే 'ఎస్400''
