Online gaming scam: ఇటీవల కాలంలో ఆన్లైన్ మోసాలు బాగా పెరిగిపోతున్నాయి. వాటిని అరికట్టేందుకు పోలీసులు ఎన్ని విధాలుగా చర్యలు చేపట్టినా.. ఇంకా పలుచోట్లా మోసాలు జరుగుతూనే ఉన్నాయి. అమాయకులను ఆసరా చేసుకుని కొన్ని ఆన్లైన్ సంస్థలు/యాప్లు నిలువునా దోపిడీ చేస్తున్నారు. తాజాగా హరియాణాలో ఓ ఆన్లైన్ ఘరానా మోసం బయటపడింది. సదరు వ్యక్తి ఫిర్యాదు మేరకు పోలీసులు దర్యాప్తు చేపట్టగా ఈ విషయం వెలుగులోకి వచ్చింది.
పోలీసుల వివరాల ప్రకారం.. హిసార్లోని పటేల్నగర్కు చెందిన చంద్రశేఖర్ అనే వ్యక్తి తనకు జరిగిన ఆన్లైన్ మోసంపై పోలీసులకు ఫిర్యాదు చేశాడు. విన్మనీ అనే మొబైల్ గేమింగ్ యాప్లో లక్షల రూపాయలు పెట్టుబడి పెట్టానని, అయితే ఆ డబ్బు తిరిగి రాలేదని తెలిపాడు. ఫిర్యాదు అందుకున్న పోలీసులు.. బాధితుడికి జరిగిన మోసాన్ని ఛేదించారు. విన్మనీ యాప్లో ఫిర్యాదుదారుడు డిపాజిట్ చేసిన డబ్బు ..మహారాష్ట్రలోని ఓ బ్యాంకు ఖాతాకు వెళ్లిందని, ఆపై ఒడిశాలోని బ్యాంకు ఖాతాలో జమ అయినట్లు పోలీసుల విచారణలో తేలింది.
ఈ కేసులో పోలీసులు ముగ్గురిని అరెస్ట్ చేశారు. వీరిలో ఒకరిని జైపుర్లో, ఇద్దరిని గుజరాత్‌లో అదుపులోకి తీసుకున్నారు. ఈ మోసానికి సంబంధించి చైనా, దుబాయ్‌లకు కూడా సంబంధాలు ఉన్నట్లు సమాచారం. నిందితుల్లో ఒకడైన ఆకాశ్ నుంచి రూ.3 లక్షలకు పైగా నగదును పోలీసులు స్వాధీనం చేసుకున్నారు. జైపుర్లో అతడికి 13 బ్యాంక్ ఖాతాలున్నట్లు విచారణలో తేల్చారు. మరో నిందితుడు సచిన్ గుడాలియా ఖాతా నుంచి రూ.300 కోట్ల లావాదేవీలు జరిగినట్లు పోలీసులు గుర్తించారు. విచారణ పూర్తయ్యాక చర్యలు తీసుకుంటామని తెలిపారు.
"ప్రస్తుత రోజుల్లో నాన్ బ్యాంకింగ్ ఫైనాన్షియల్ కంపెనీలు చాలా నడుస్తున్నాయి. వీరంతా అధిక వడ్డీలు ఇస్తామని చెప్పి పెట్టుబడిదారులను ఆకర్షిస్తున్నారు. టెలిగ్రామ్ తదితర యాప్స్ ద్వారా ప్రచారం చేసి ప్రజలను మభ్యపెడుతున్నారు. ఓ లింక్ పంపి యాప్ డౌనలోడ్ చేయిస్తున్నారు. ఇక ఆ తర్వాత యాప్లో గేమ్స్ ఆడి గెలిస్తే రెట్టింపు డబ్బులు వస్తాయని ఎర వేస్తున్నారు. ముందు చిన్న మొత్తం డబ్బులు మదుపు పెట్టినప్పుడు లాభం సరైన సమయంలోనే డిపాజిట్ చేస్తున్నారు. ఆ తర్వాత పెద్ద మొత్తంలో పెట్టుబడి పెట్టేసమయాన్ని అదనుగా తీసుకుని మోసం చేస్తున్నారు. అలా ప్రజలు చిన్నపాటి పొరపాట్లతో రూ.లక్షల్లో మోసపోతున్నారు." అని పోలీసులు తెలిపారు.
ఇవీ చదవండి: గ్రాండ్గా కుక్క బర్త్డే పార్టీ.. 100కేజీల కేక్ కటింగ్.. ఐదు వేల మందికి భోజనాలు
శిందే తిరుగుబాటు సక్సెస్.. బలంగా రెబల్ క్యాంప్.. ఠాక్రేకు ఛాన్స్ ఉందా?
