Heroin seized in UP: మాదకద్రవ్యాల ముఠాపై గుజరాత్ ఏటీఎస్ ఉక్కుపాదం మోపుతోంది. కొద్ది రోజులుగా వివిధ ప్రాంతాల్లో తనిఖీలు చేస్తూ కోట్ల రూపాయలు విలువ చేసే మత్తు పదార్థాలను పట్టుకుంది. తీగ లాగితే డొంక కదిలినట్లు తాజాగా ఓ నిందితుడిని విచారించగా.. భారీగా మాదకద్రవ్యాలు పట్టుబడ్డాయి. ఉత్తర్ప్రదేశ్, ముజఫర్నగర్ జిల్లా మొహళ్ల కిద్వాయినగర్ ప్రాంతంలో గుజరాత్ ఏటీఎస్ తనిఖీలు చేపట్టింది. సుమారు రూ.1300 కోట్ల విలువైన హెరాయిన్ పట్టుకుంది.
ఇదీ జరిగింది: మూడు రోజుల క్రితం దిల్లీ షాహీన్బాగ్లో అఫ్గానిస్థాన్ నుంచి నగరానికి వచ్చిన 97 కిలోల హెరాయిన్ సహా రూ.30 లక్షల నగదు స్వాధీనం చేసుకుంది ఎన్సీబీ. ఈ కేసులో ఖైరానాకు చెందిన అహ్మద్, ఇద్దరు అఫ్గానిస్థానీలను అరెస్ట్ చేసింది. అహ్మద్ను విచారించగా.. ఉత్తర్ప్రదేశ్లోని ముజఫర్నగర్కు చెందిన హైదర్ పేరు బయటకు వచ్చింది. దీంతో హైదర్ను అదుపులోకి తీసుకుని విచారించాయి ఎన్సీబీ, గుజరాత్ ఏటీఎస్. ఈ క్రమంలో ముజఫర్నగర్లోని తన ఇంటిలో డ్రగ్స్ దాచినట్లు ఒప్పుకున్నాడు నిందితుడు. అతడు ఇచ్చిన సమాచారం మేరకు కిద్వాయి నగర్కు ఓ టీమ్ వెళ్లి అతడి ఇంట్లో సోదాలు నిర్వహించగా.. భారీగా డ్రగ్స్ బయటపడ్డాయి. హైదర్తో పాటు ఇమ్రాన్ అనే వ్యక్తి ఈ కేసులో ఉన్నట్లు తెలిసింది.
హైదర్ అలియాస్ చున్ను 30 ఏళ్ల క్రితం పెయింటర్గా పని చేసేవాడు. 20 ఏళ్ల క్రితం దిల్లీకి వెళ్లి ఓ దొంగతనం కేసులో జైలుకు వెళ్లివచ్చాడు. ఆ తర్వాత షాహీన్బాగ్లో నివాసం ఉంటున్నాడు. మాదకద్రవ్యాలు విక్రయిస్తూ కొన్నేళ్లలోనే మిలియనీర్గా అవతరించాడు. కిద్వాయి నగర్లో విలాసవంతమైన ఓ ఇంటిని నిర్మించాడు. ఇటీవల గుజరాత్ తీరంలో పట్టుకున్న డ్రగ్స్ కేసులోనూ హైదర్ పేరు వచ్చినట్లు అధికారులు తెలిపారు.
ఇదీ చూడండి: రూ.1439 కోట్ల విలువైన హెరాయిన్ పట్టివేత
