లైంగిక వేధింపుల కేసులో గుజరాత్కు చెందిన వివాదాస్పద ఆధ్యాత్మిక గురువు ఆశారాం బాపూనకు గాంధీనగర్ కోర్టు జీవిత ఖైదు విధించింది. బాధితురాలికి రూ. 50 వేలు పరిహారం ఇవ్వాలని ఆదేశించింది. ఈ కేసులో గాంధీనగర్ కోర్టు విచారణ చేపట్టింది. వాదులు, ప్రతివాదులకు సంబంధించిన 68 సాక్షులను విచారించింది. ఇరు పక్షాల వాదనలు విన్న సెషన్స్ కోర్టు జడ్జి డీకే సోని.. ఆశారాంను దోషిగా తేల్చారు. ఈ కేసులో ఆరోపణలు ఎదుర్కొన్న మరో ఐదుగురిని నిర్దోషులుగా కోర్టు ప్రకటించింది. ఇందులో ఆశారాం భార్య లక్ష్మీబెన్తో పాటు ఆమె కుమార్తె, నలుగురు శిష్యులు ఉన్నారు. అయితే, గాంధీనగర్ సెషన్స్ కోర్టు ఇచ్చిన తీర్పును హైకోర్టులో సవాలు చేస్తామని ఆశారాం బాపు తరపు లాయర్ తెలిపారు.
ఆశారాం తనపై అత్యాచారానికి పాల్పడినట్లు సూరత్‌కు చెందిన ఓ మహిళ 2013లో పోలీసులకు ఫిర్యాదు చేసింది. 2001 నుంచి 2006 వరకు ఆశ్రమంలో ఉన్న తనపై బాపూ అత్యాచారం చేసినట్లు ఆరోపించింది. ఈ కేసులో ఆశారాం బాపూతో పాటు మరో ఏడుగురిపై పోలీసులు కేసు నమోదు చేశారు. కేసు విచారణలో ఉండగానే అందులో ఒకరు మరణించారు.
ప్రస్తుతం మరో రేప్ కేసులో 81 ఏళ్ల ఆశారాం బాపు.. రాజస్థాన్ జోధ్పుర్లోని ఓ జైలులో శిక్ష అనుభవిస్తున్నారు. 2013లో ఓ మైనర్పై అత్యాచారం చేశారనే ఆరోపణలపై కేసు నమోదైంది. ఈ కేసులో విచారణ చేపట్టిన జోధ్పుర్ ట్రయల్ కోర్టు.. 2018లో దోషిగా తేల్చింది.
