గుజరాత్ ఎలక్షన్స్ సర్వత్రా ఆసక్తి రేకెత్తిస్తున్న వేళ.. ఓ నియోజక వర్గం అందరి దృష్టిని ఆకర్షిస్తోంది. రాష్ట్రంలో త్రిముఖ పోరు ఖాయం అనుకుంటున్నవేళ.. ఓ అసెంబ్లీ స్థానానికి ద్విముఖ పోరు నెలకొంది. భర్తపైనే పోటీకి దిగింది ఓ భార్య. ఆ అత్తకే తన మద్దతు ఇస్తానంది కోడలు. ఇంతకీ విషయం ఏంటంటే..
ప్రభాత్సింగ్ చౌహాన్.. కాంగ్రెస్ పార్టీ నుంచి 1980, 85లో రెండు సార్లు కలోల్ అసెంబ్లీ స్థానం నుంచి ఎమ్మెల్యేగా గెలిచారు. అనంతరం 1995లో భాజపాలోకి చేరి.. అదే నియోజక వర్గం నుంచి భాజపా తరఫున 1995, 1998, 2002 అసెంబ్లీ ఎన్నికల్లో గెలిచారు. ఆ తర్వాత పంచమహల్ పార్లమెంట్ నియోజకవర్గం నుంచి 2009, 2014లో గెలుపొందారు. అయితే తనకు ఇష్టం లేకున్నా పార్టీ అధిష్ఠానం.. 2017లో తన కోడలుకు కలోల్ అసెంబ్లీ టికెట్ ఇచ్చింది. దీంతో ఈ సారి తనకు టికెట్ లభించదన్న కారణంగా పార్టీ నుంచి బయటకు వచ్చి సొంత గూటికి చేరారు ప్రభాత్ సింగ్.
దీనిపై ప్రభాత్సింగ్ కుటుంబం నుంచి వ్యతిరేక స్వరాలు వినిపిస్తున్నాయి. ఈసారి కలోల్ స్థానంలో మాజీ ఎమ్మెల్యే ఫతేసింగ్ను పార్టీ బరిలోకి దించుతున్నా.. తాము మాత్రం భాజపాను వదిలి వెళ్లేది లేదని ప్రభాత్ సింగ్ భార్య రంగేశ్వరిబెన్ రత్వా వెల్లడించారు. రంగేశ్వరిబెన్కు ఆమె కోడలు సుమన్బెన్ చౌహాన్ మద్దతుగా నిలిచారు. కాంగ్రెస్ నుంచి కలోల్ అసెంబ్లీ సీటు ప్రభాత్ సింగ్కు దాదాపు ఖాయమైంది. దీంతో పోరు భార్యాభర్తల మధ్య నెలకొంది. తన కుటుంబ సభ్యుల మద్దతు తనకు లేకున్నా ఒరిగేదేమిలేదని అన్నారు ప్రభాత్ సింగ్. తనతో కాంగ్రెస్ కార్యకర్తలు ఉన్నారని.. వారే తనను గెలిపిస్తారని ధీమా వ్యక్తం చేశారు. అయితే డిసెంబర్ 1న జరగనున్న పోలింగ్లో ప్రజలు ఈ విడిపోయిన కుటుంబంలో ఎవరివైపు ఉంటారన్న విషయంపై సర్వత్రా ఆసక్తి నెలకొంది.
ఇవీ చదవండి : ఆప్ వర్సెస్ గవర్నర్.. మరింత ముదిరిన వివాదం.. ప్రభుత్వ కార్యాలయానికి ఎల్‌జీ సీల్‌
