వలంటీర్​ అరాచకం- చోరీ ఆరోపణతో యువకుడిపై కిరాతకంగా దాడి

దొంగతనం ఆరోపణతో ఓ యువకుడిని నడిరోడ్డిపై చితకబాదాడు ఓ పోలీసు వలంటీర్​. కోల్​కతా నగరంలో ఆదివారం సాయంత్రం జరిగిన ఈ ఘటనకు సంబంధించిన వీడియోలు వైరల్​గా మారాయి. దీంతో పోలీసు వలంటీర్​ను సస్పెండ్​ చేశారు అధికారులు.

బంగాల్​ రాజధాని కోల్​కతాలో అమానుష ఘటన వెలుగుచూసింది. బస్సులో చోరీకి పాల్పడాడనే ఆరోపణతో అనుమానితుడిని దారుణంగా కొట్టాడు ఓ సిటీ పోలీసు వలంటీరు. దక్షిణ మధ్య కోల్‌కతాలో ఆదివారం సాయంత్రం జరిగిందీ ఘటన.

ఇదీ జరిగింది

బస్సులో తన బ్యాగును ఓ వ్యక్తి దొంగిలించడానికి యత్నించాడని ఓ మహిళ ఆరోపించింది. దీంతో స్థానికులు.. అతనిని పట్టుకుని చితకబాదారు. అయితే సమీపంలో విధులు నిర్వహిస్తున్న పోలీసు వలంటీర్​ తన్మయ్​ బిశ్వాస్​.. ఆ అనుమానితుడిని అదుపులోకి తీసుకుని మరింత దారుణంగా కొట్టాడు. కాలుతో ఛాతీపై తన్నాడు. అనంతరం దీనికి సంబంధించిన దృశ్యాలు సామాజిక మాధ్యమాల్లో వైరల్​గా మారాయి. దీంతో నెటిజన్లు ఆ పోలీసు వలంటీర్​పై విమర్శలు గుప్పించారు. 2020లో అమెరికాలో ఓ పోలీసు అధికారి.. ఆఫ్రికన్​ సంతతి వ్యక్తి అయిన జార్జ్ ఫ్లాయిడ్​పై చేసిన జాత్యహంకార దాడిని గుర్తు చేసిందని ఆవేదన వ్యక్తం చేశారు.

అనుమానితుడిని కొడుతున్న పోలీసు వలంటీర్​

ఈ పరిణామాల అనంతరం సిటీ పోలీస్​ కమిషనర్​ సోమెన్​ మిత్రా.. ఈ ఘటనపై క్షమాపణలు చెప్పి, దిగ్భ్రాంతికి గురైనట్లు పేర్కొన్నారు. బిశ్వాస్​ను సస్పెండ్​ చేశామని.. ఈ వ్యవహారంపై విచారణకు ఆదేశించినట్లు ఆయన తెలిపారు.

అనుమానితుడిని కొడుతున్న పోలీసు వలంటీర్​

నేనే రక్షించాను.. కానీ..

అయితే అనుమానితుడిని కొట్టడానికి కొన్ని కారణాలున్నాయని సమర్థించుకున్నాడు బిశ్వాస్. "అనుమానితుడిని స్థానికులు కొడుతుంటే.. వారి నుంచి నేనే రక్షించాను. కానీ అతను పారిపోవడానికి ప్రయత్నించాడు. అతనిని అదుపులోకి తీసుకురావడానికి చాలా కష్టపడాల్సి వచ్చింది" అని బిశ్వాస్​ పేర్కొన్నాడు.

ఇదీ చూడండి: టవల్​ ఆలస్యంగా ఇచ్చిందని భార్యను దారుణంగా చంపిన భర్త