Longest chunari: ఛత్తీస్గఢ్ దంతేవాడకు చెందిన మహిళలు 11 కిలోమీటర్ల పొడవు ఉన్న వస్త్రాన్ని తయారు చేసి ప్రపంచ రికార్డు సృష్టించారు. దంతేవాడలోని డెనెక్స్ అనే టెక్స్టైల్ ఫ్యాక్టరీకి చెందిన మహిళలు ఈ వస్త్రాన్ని రూపొందించారు. ఈ వస్త్రాన్ని.. ముఖ్యమంత్రి భూపేశ్ భఘేల్ చేతుల మీదుగా స్థానికంగా ఉన్న దంతేశ్వరి ఆలయానికి సమర్పించారు. ఇదివరకు మధ్యప్రదేశ్లోని మందసూర్ నర్మదా మైయా ఆలయానికి అక్కడి ప్రజలు 8 కిలోమీటర్ల పొడవు ఉన్న వస్త్రాన్ని సమర్పించారు. తాజాగా దీనిని బద్దలు కొట్టి సరికొత్త రికార్డును నెలకొల్పారు దంతేవాడ మహిళలు. గోల్డెన్ బుక్ ఆఫ్ వరల్డ్ రికార్డ్లో దీనికి చోటు దక్కింది.
శోభాయత్ర..: ప్రత్యేకంగా రూపొందించిన ఈ వస్త్రానికి ఆదివారం శోభాయత్ర నిర్వహించారు స్థానికులు. డెనెక్స్ ఫ్యాక్టరీకి చెందిన 300 మంది మహిళలు కేవలం ఏడు రోజుల్లో రూపొందించిన ఈ వస్త్రాన్ని దంతేవాడ పట్టణంలో 11 కిలోమీటర్లు ఊరేగించారు. ఇది చూసేందుకు భారీ సంఖ్యలో ప్రజలు తరలివచ్చారు. మంగళవారం.. దంతేవాడకు చేరుకున్న ముఖ్యమంత్రి భుపేశ్ భఘేల్ ఆ వస్త్రాన్ని అమ్మవారికి సమర్పించారు.
మహిళలకు ఉపాధి కల్పనే లక్ష్యంగా డెనెక్స్ పేరుతో 2021 జనవరి 31న వస్త్ర పరిశ్రమను ప్రారంభించారు సీఎం. ఈ క్రమంలో ఇప్పటివరకు 500 మందికిపైగా మహిళలకు ఉపాధి లభిస్తోంది. 1200లకుపైగా కుటుంబాలకు ఉపాధిని కల్పించడమే లక్ష్యంగా ఈ సంస్థ కృషి చేస్తోందని అధికారులు వెల్లడించారు.
ఇదీ చూడండి : కాంగ్రెస్ కోసం 'టాస్క్ఫోర్స్'.. మూడు బృందాలతో ఎన్నికలకు రెడీ!
