సెంట్రల్ సిలబస్ చదివే విద్యార్థులకు గుడ్ న్యూస్. 10, 12వ తరగతి విద్యార్థులకు నిర్వహించే వార్షిక పరీక్షల్లో కీలక మార్పులను తెస్తున్నట్లు ప్రకటించింది సీబీఎస్ఈ బోర్డు. 2024 విద్యా సంవత్సరం నుంచి నిర్వహించే పరీక్షలలో అత్యధిక మార్కులు మల్టిపుల్ ఛాయిస్ ప్రశ్నలకే కేటాయించనున్నట్లు తెలిపింది. షార్ట్, లాంగ్ ఆన్సర్ టైప్ ప్రశ్నలకు ఇంతకుముందు ఉన్న మార్కుల వెయిటేజీని తగ్గిస్తున్నట్లు గురువారం వెల్లడించింది.
2024లో జరగబోయే సీబీఎస్ఈ 10, 12వ తరగతి పరీక్షల నుంచి ఈ నిర్ణయాన్ని అమలు చేస్తామని స్పష్టం చేసింది బోర్డు. కొత్తగా మల్టిపుల్ ఛాయిస్ ప్రశ్నలను ప్రవేశపెట్టడం ద్వారా వివిధ రకాల ప్రశ్నలకు ఇదివరకు ఉన్న మార్కుల వెయిటేజీ తగ్గనున్నట్లు పేర్కొంది. ఈ నిర్ణయంతో ప్రశ్నాపత్రాల మూల్యాంకన విధానంలో కూడా పలు మార్పులు చేయనున్నట్లు అధికారులు చెప్పారు. నేషనల్ ఎడ్యూకేషన్ పాలసీ(ఎన్ఈపీ)-2020 సిఫార్సుల మేరకు ఈ నిర్ణయం తీసుకున్నామని బోర్డు తెలిపింది.
ఈ మార్పు 2023-24 అకాడమిక్ సంవత్సరానికి మాత్రమే పరిమితం కావచ్చని సీబీఎస్ఈ బోర్డు చెప్పింది. ఎన్సీఈఆర్టీ మార్గదర్శాల మేరకు వచ్చే ఏడాది కొత్తగా నేషనల్ కరికులం ఫ్రేమ్వర్క్తో బోర్డు పరీక్షలను రూపొందిస్తామని వివరించింది. విద్యార్థుల్లో సృజనాత్మకతతో పాటు విమర్శనాత్మక ఆలోచనా సామర్థ్యాలను పెంపొందించడంపై మరింత దృష్టి సారించామని.. పేర్కొంది. ఈ విధానంతో విద్యార్థుల్లో చదువుపై ఆసక్తి పెరిగి మంచి ఫలితాలు సాధిస్తారని సీబీఎస్ఈ డైరెక్టర్ జోసెఫ్ ఇమాన్యుయెల్ అన్నారు. అందువల్ల రాబోయే సంవత్సరంలో మల్టిపుల్ ఛాయిస్ ప్రశ్నలే ఎక్కువ సంఖ్యలో ఉంటాయని ఆయన అన్నారు.
పదో తరగతి.. 50 శాతం ప్రశ్నలు వీటిపైనే!
10వ తరగతిలో 50 శాతం మార్కులు మల్టిపుల్ ఛాయిస్ క్వశ్చన్స్, కేస్ స్టడీస్ ప్రశ్నలు, సోర్స్ ఆధారిత ఇంటిగ్రేటెడ్ లేదా విద్యార్థుల సామర్థ్యాన్ని అంచనా వేసే ప్రశ్నలే ఉండనున్నాయి. గత అకడమిక్ ఇయర్లో ఇలాంటి ప్రశ్నలకు కేవలం 40 శాతం వెయిటేజీ ఉండేది. ఇప్పటి నుంచి ఆబ్జెక్టివ్ టైప్ ప్రశ్నలు తప్పనిసరిగా 20 శాతం వెయిటేజీతో మల్టిపుల్ ఛాయిస్ ప్రశ్నలుగా ఉండనున్నాయి. షార్ట్ ఆన్సర్, లాంగ్ ఆన్సర్ ప్రశ్నల మార్కుల వెయిటేజీని గతేడాది 40 శాతం నుంచి 30 శాతానికి తగ్గించింది బోర్డు.
12వ క్లాస్.. 40 శాతం మార్కులు వీటి ద్వారానే!
12వ తరగతిలో కూడా 40 శాతం ప్రశ్నలు మల్టిపుల్ ఛాయిస్ ప్రశ్నలు, కేస్ స్టడీస్ ఆధారిత ప్రశ్నలు, సోర్స్-బేస్డ్ ఇంటిగ్రేటెడ్ ప్రశ్నలు లేదా ఇతర రూపాల్లో విద్యార్థుల నైపుణ్యాలను పరీక్షించే వాటిపై ఉంటాయి. కాగా, గత అకడమిక్ సంవత్సరంలో ఇలాంటి ప్రశ్నలకు వెయిటేజీ కేవలం 30 శాతమే. ఇప్పటి నుంచి ఆబ్జెక్టివ్ టైప్ ప్రశ్నలు తప్పనిసరిగా 20 శాతం వెయిటేజీతో మల్టిపుల్ ఛాయిస్ ప్రశ్నలు ఉండనున్నాయి. షార్ట్ ఆన్సర్, లాంగ్ ఆన్సర్ తరహా ప్రశ్నలకు గతేడాది 50 శాతం వెయిటేజీని తొలగించి 40 శాతానికి తగ్గించారు.
