ఆర్థిక మోసాలకు పాల్పడుతున్న సైబర్ నేరగాళ్లే లక్ష్యంగా చేసుకుని కేంద్ర దర్యాప్తు సంస్థ(సీబీఐ) దేశవ్యాప్తంగా దాడులు చేపట్టింది. 'ఆపరేషన్ చక్ర' పేరుతో 105 ప్రదేశాల్లో దాడులు నిర్వహించింది. ఈ దాడుల్లో రూ.1.5 కోట్ల నగదు, 1.5 కేజీల బంగారం స్వాధీనం చేసుకున్నారు. ఆయా రాష్ట్రాల పోలీసులతో కలిసి సీబీఐ అధికారులు ఈ దాడుల్లో పాల్గొన్నారు. ఇంటర్పోల్, ఎఫ్బీఐ, రాయల్ కెనడియన్ మౌంటైన్ పోలీస్, ఆస్ట్రేలియన్ ఫెడరల్ పోలీసులు ఇచ్చిన సమాచారంతోనే ఈ దాడులు జరిపినట్లు తెలిపారు.
'ఆపరేషన్ చక్ర' పేరుతో సీబీఐ దేశవ్యాప్తంగా 105 చోట్ల దాడులు జరపగా.. అందులో 87 ప్రదేశాలు రాష్ట్రాల్లో ఉన్నాయని అధికారులు తెలిపారు. మరో 18 ప్రదేశాలు కేంద్రపాలిత ప్రాంతాల్లో ఉన్నాయని చెప్పారు. ఈ దాడుల్లో 300 మందికి పైగా అనుమానితులను గుర్తించినట్లు తెలుస్తోంది. అండమాన్ నికోబార్ దీవుల్లో నాలుగు, దిల్లీలో ఐదు, చండీగఢ్లో మూడు, పంజాబ్, కర్ణాటక, అసోంలో ఒక్కొక్క చోట సోదాలు చేశామని అధికారులు తెలిపారు. అమెరికా పౌరులను లక్ష్యంగా చేసుకుని పుణె, అహ్మదాబాద్‌లలోని రెండు కాల్‌ సెంటర్లలో సోదాలు నిర్వహించినట్లు వెల్లడించారు. ఈ విషయాన్ని అమెరికా దర్యాప్తు సంస్థ ఫెడరల్ బ్యూరో ఆఫ్ ఇన్వెస్టిగేషన్(ఎఫ్బీఐ)కు తెలియజేశామని పేర్కొన్నారు.
ఇవీ చదవండి: విషమంగానే ములాయం ఆరోగ్యం.. ఆస్పత్రికి కుటుంబ సభ్యులు.. అఖిలేశ్కు యోగి ఫోన్
