CASTE DISCRIMINATION: ఉత్తరాఖండ్ చంపావత్ జిల్లా సూఖీడాంగ్ గ్రామంలోని పాఠశాల యాజమాన్యానికి వచ్చిన సమస్యకు పరిష్కారం చూపారు అధికారులు. స్థానికంగా ఉండే ప్రభుత్వ సెకండరీ పాఠశాలలో మధ్యాహ్న భోజనాన్ని దళిత మహిళ వండుతోందని.. అక్కడి విద్యార్థులు అన్నం తినేందుకు నిరాకరించారు. ఆమెను విధుల్లో నుంచి తొలగించి అగ్రవర్ణాలకు చెందిన వంట మనిషిని నియమించారు. అయితే, ఇక్కడ మరో సమస్య ఎదురైంది. ఎస్సీ, ఎస్టీ సామాజిక వర్గాలకు చెందిన పిల్లలు.. అగ్రకులానికి చెందిన మహిళ వండే ఆహారాన్ని తినడానికి నిరాకరించారు.
పాఠశాలలో 6 నుంచి 8 తరగతుల వరకు 58 మంది విద్యార్థులు ఉన్నారు. గత శుక్రవారం మధ్యాహ్న భోజనానికి పిల్లలందరినీ పిలిచారు. ఈ క్రమంలో వారిలో ఉండే 23 మంది ఎస్సీ సామాజిక వర్గానికి చెందిన పిల్లలు భోజనం చేయడానికి నిరాకరించారు. ఈ అన్నం వండింది అగ్రవర్ణాలకు చెందిన మహిళ కావున తాము తినమని స్పష్టం చేశారు.
ఈ విషయపై ప్రిన్సిపాల్ ప్రేమ్ సింగ్ ఉన్నతాధికారులకు లేఖ రాశారు. వంట మనిషి విషయంపై పోలీస్ కేసు కూడా నమోదు అయ్యింది. ఈ కేసు విషయం బయటకు వచ్చిన నేపథ్యంలో ఉత్తరాఖండ్ ముఖ్యమంత్రి పుష్కర్ సింగ్ ధామీ దీనిని పరిష్కరించాల్సిందిగా అధికారులను ఆదేశించారు. రంగంలోకి దిగిన కుమాను డీఐజీ నీలేష్ ఆనంద్ భరణే తానే పూర్తి స్థాయిలో విచారణ జరిపారు. సీఓ అశోస్ కుమార్, అవుట్పోస్ట్ ఇన్ఛార్జి దేవేంద్ర బిషత్ వివాదంపై సిబ్బందిని అడిగి తెలుసుకున్నారు. ఇరువర్గాలను కూర్చోపెట్టి వారితో చర్చించారు. భోజనమాత విషయంలో ఏర్పడిన గందరగోళానికి ముగింపు పలికారు. విద్యార్థులంతా భోజనం చేసేలా అవగాహన కల్పించారు.
ఇదీ చూడండి: దళిత మహిళ వండుతోందని.. భోజనం మానేసిన విద్యార్థులు!
