Cash van loot in India: హరియాణా గురుగ్రామ్లో పట్టపగలే భారీ దోపిడీ జరిగింది. కొందరు దుండగులు కలిసి క్యాష్ కలెక్షన్ కంపెనీకి చెందిన వ్యాన్ గార్డులు, సిబ్బందిని బెదిరించి రూ.కోటి నగదు ఎత్తుకెళ్లారు. సోమవారం గురుగ్రామ్లోని సుభాష్ చౌక్ ప్రాంతంలో జరిగిందీ ఘటన. సీసీటీవీ కెమెరాల్లో నమోదైన దృశ్యాల ఆధారంగా పోలీసులు ముమ్మర దర్యాప్తు చేస్తున్నారు.
ఉదయం నుంచి ఫాలో అవుతూ..: పోలీసుల కథనం ప్రకారం.. ఎస్&ఐబీ అనేది ఓ ప్రైవేట్ క్యాష్ కలెక్షన్ కంపెనీ. వేర్వేరు వ్యాపార సంస్థల కార్యాలయాలు, పెద్ద దుకాణాల నుంచి రోజూ నగదు తీసుకెళ్లి.. బ్యాంకులో డిపాజిట్ చేయడం ఆ సంస్థ పని. సోమవారం ఉదయం కూడా యథావిధిగా డ్యూటీ చేస్తున్నారు ఎస్&ఐబీ క్యాష్ వ్యాన్ సిబ్బంది. గార్డుల పర్యవేక్షణలో అప్పటికే 10-11 కార్యాలయాలకు వెళ్లి నగదు తీసుకున్నారు. ఆ మొత్తం రూ.కోటిపైనే ఉంది.
అయితే.. ఉదయం నుంచి తమ వ్యాన్ను కొందరు ఫాలో అవుతున్నారని గార్డులు, సిబ్బంది గుర్తించలేకపోయారు. సుభాష్ చౌక్ వద్ద సోహ్నా రోడ్లోని మారుతి షోరూం నుంచి క్యాష్ కలెక్ట్ చేసుకునేందుకు వెళ్లారు. అప్పుడే నలుగురైదుగురు దుండగులు మెరుపు వేగంతో వచ్చారు. గార్డులు, సిబ్బంది కళ్లల్లో కారం కొట్టారు. ఏం జరుగుతుందో తెలుసుకునేలోపే వారి తలలకు తుపాకులు గురిపెట్టారు. వ్యాన్లోని డబ్బు మొత్తాన్ని క్షణాల్లోనే తమ వాహనంలో వేసుకుని పరారయ్యారు. "క్యాష్ వ్యాన్ సిబ్బంది చెప్పిన వివరాలు, నేరం జరిగిన ప్రదేశంలోని సీసీటీవీ కెమెరాల దృశ్యాల ఆధారంగా దర్యాప్తు చేస్తున్నాం. దొంగలు వాడిన వాహనం నంబర్ ప్లేట్ కనుగొనేందుకు ప్రయత్నిస్తున్నాం." అని తెలిపారు గురుగ్రామ్ ఈస్ట్ జోన్ డీసీపీ వీరేంద్ర విజ్.
వారం వ్యవధిలోనే..: గత శుక్రవారం ఇదే తరహా ఘటన జరిగింది. హరియాణా రోహ్తక్లో ఏటీఎంలలో నింపేందుకు డబ్బు తీసుకెళ్తున్న క్యాష్ వ్యాన్ను దొంగలు దోచుకున్నారు. బైక్పై వచ్చిన ఇద్దరు వ్యక్తులు.. తొలుత సెక్యూరిటీ గార్డులపై కాల్పులు జరిపారు. అతడి దగ్గరున్న ఆయుధాన్ని లాక్కున్నారు. ఏటీఎంలో నగదు నింపుతున్న సిబ్బంది.. ఈ దాడిని చూసి భయపడి పారిపోయారు. ఇద్దరు దొంగలు కలిసి రూ.2 లక్షల 62 వేలను సంచిలో నింపుకుని, పరారయ్యారు.
