Bihar blast: బిహార్ భాగల్పుర్ జిల్లాలో గురువారం అర్ధరాత్రి సమయంలో భారీ పేలుడు సంభవించింది. ఈ ఘటనలో ఓ చిన్నారి సహా పది మంది మృతి చెందారు. పది మందికిపైగా తీవ్రంగా గాయపడ్డారు. తాతార్పుర్ పోలీస్ స్టేషన్ పరిధి, కాజ్వాలీచక్ ప్రాంతంలోని ఓ ఇంటిలో ఈ పేలుడు సంభవించింది. పేలుడు ధాటికి ఇల్లు పూర్తిగా ధ్వంసమైంది. సమీపంలోని పలు ఇళ్లు దెబ్బతిన్నాయి. పేలుడుతో స్థానిక ప్రజలు భయబ్రాంతులకు గురయ్యారు.
సమాచారం అందుకున్న పోలీసులు సంఘటనా స్థలానికి చేరుకుని సహాయక చర్యలు చేపట్టారు. జిల్లా కలెక్టర్, ఎస్ఎస్పీ, డీఐజీలు ఘటనాస్థలాన్ని పరిశీలించారు. మృతుల్లో ఓ చిన్నారి ఉన్నట్లు తెలిపారు. శిథిలాలను తొలగిస్తున్నామని, మృతుల సంఖ్య మరింత పెరిగే అవకాశం ఉన్నట్లు వెల్లడించారు.
" ఆ కుటుంబం నాటు బాంబులు, బాణసంచా తయారు చేస్తున్నట్లు ప్రాథమిక విచారణలో తేలింది. పేలుడు సామగ్రి భారీగా ఉండటం కారణంగానే ఇంత పెద్ద ఎత్తున పేలుడు సంభవించినట్లు బావిస్తున్నాం. ఈ పేలుడులో సమీపంలోని 4 ఇళ్లు ధ్వంసమయ్యాయి. ఈ విషయంపై దర్యాప్తు కొనసాగుతోంది. బాధితల వాంగ్మూలం నమోదు చేస్తున్నాం. 10 మృతదేహాలను స్వాధీనం చేసుకుని పోస్ట్మార్టం కోసం పంపించాం. బాంబు నిర్వీర్య బృందాలు, ఫోరెన్సిక్ అధికారులు సంఘటన స్థలానికి చేరుకుని పేలుడుకు సంబంధించిన పదార్థాన్ని గుర్తించేందుకు నమూనాలు సేకరించారు. "
- సుబ్రాత్ కుమార్ సెన్, భాగల్పుర్ డీఎం.
ప్రధాని మోదీ దిగ్భ్రాంతి..
బిహార్ భాగల్పుర్ జిల్లాలో భారీ పేలుడు సంభవించి ఎనిమిది మంది ప్రాణాలు కోల్పోయిన ఘటనపై దిగ్భ్రాంతి వ్యక్తం చేశారు ప్రధానమంత్రి నరేంద్ర మోదీ. గాయపడినవారు త్వరగా కోలుకోవాలని ఆకాంక్షించారు. ఈ అంశంపై ముఖ్యమంత్రి నితీశ్ కుమార్తో మాట్లాడినట్లు ట్వీట్ చేశారు. బాధితులకు అన్ని రకాల సహయం అదిస్తామని భరోసా ఇచ్చారు.
