శివసేన నేతృత్వంలోని మహారాష్ట్ర వికాస్ అఘాడీలో విభేదాలు మొదలయ్యాయా? సీఎం ఉద్ధవ్ ఠాక్రేపై కాంగ్రెస్ అసంతృప్తితో ఉందా? ప్రస్తుత పరిణామాలు చూస్తుంటే అవుననే అనిపిస్తోంది.
ప్రభుత్వంలో తమకు క్రియాశీల పాత్ర లేదని కాంగ్రెస్ అసహనంతో ఉన్నట్లు ఆ పార్టీ వర్గాలు వెల్లడించాయి. కీలక నిర్ణయాలు, ముఖ్యమైన సమావేశాల్లో తమకు ప్రాధాన్యం ఇవ్వడం లేదని పేర్కొన్నాయి. ఈ విషయాలపై చర్చించేందుకు ఉద్ధవ్తో వచ్చేవారం భేటీ కానున్నట్లు పేర్కొన్నాయి.
'అన్నీ ఆయనతోనే...'
సీఎం ఉద్ధవ్ ఠాక్రే.. ఎన్సీపీ అధినేత శరద్ పవార్తో మాత్రమే సమావేశం అవుతున్నారని కాంగ్రెస్ వర్గాలు అసహనం వ్యక్తం చేస్తున్నాయి. కరోనా, నిసర్గ తుపానుతో ప్రభావితమైన వారికి సాయం వంటి అంశాలపైనా ఆయనతోనే చర్చలు జరిపారని గుర్తు చేశాయి. కీలక అంశాలపై చర్చించే సమావేశాల కోసం కాంగ్రెస్కు ఆహ్వానం అందడంలేదని, ఈ విషయం సహా మరికొన్ని ఇతర ఆంశాల్లో సీఎంపై తాము అసంతృప్తితో ఉన్నట్లు కాంగ్రెస్ మంత్రి ఒకరు చెప్పారు. వాటిపై చర్చించేందుకే ఆయనతో సమావేశం కావాలని నిర్ణయించుకున్నట్లు తెలిపారు.
గతేడాది నవంబరులో శివసేన, ఎన్సీపీ, కాంగ్రెస్ సంకీర్ణ ప్రభుత్వం అధికారంలోకి వచ్చినప్పుడే పాలనాపరమైన బాధ్యతలను సమానంగా పంచుకోవాలని నిర్ణయించినట్లు కాంగ్రెస్ నేత ఒకరు తెలిపారు. గవర్నర్ కోటాలో శాసన మండలి నామినేషన్లు, కాంగ్రెస్ మంత్రులు ఎదుర్కొంటున్న సమస్యలు సహా పలు కీలక అంశాలపై చర్చించేందుకు పార్టీ అధ్యక్షుడు బాలాసాహెబ్ థోరట్, పీడబ్ల్యూడీ మంత్రి ఆశోక్ చవాన్.. ఉద్ధవ్ ఠాక్రేతో సోమవారం భేటీ అవుతారని చెప్పారు.
