భారత్లో మరోసారి విధ్వంసం సృష్టించేందుకు పాక్ అండతో ఉగ్రమూకలు కుయుక్తులు పన్నుతున్నాయని నిఘావర్గాలు తీవ్ర హెచ్చరికలు జారీచేశాయి. భారీ సంఖ్యలో ముష్కరులను దేశంలోకి పంపేందుకు ప్రయత్నాలు చేస్తున్నట్లు పేర్కొన్నాయి.
గురేజ్, కంజల్వాన్ నుంచి దేశంలోకి చొరబడేందుకు 13 మంది ఉగ్రవాదులు ప్రయత్నం చేయవచ్చని తెలిపాయి నిఘావర్గాలు. వీరిలో 8 మంది లష్కరే తోయిబా సభ్యులు ఉన్నట్లు వెల్లడించాయి. నౌషెరా సమీపంలో పాక్ ఆక్రమిత కశ్మీర్(పీఓకే)లో శిబిరాల వద్ద 18 మంది ఉగ్రవాదులు ఉన్నట్లు కూడా తెలిపిన నిఘావర్గాలు.. ఉరీలో ప్రవేశించేందుకు మూడు బృందాలు సిద్ధంగా ఉన్నట్లు హెచ్చరించాయి.
పాక్ ఆర్మీతో జతకట్టి..
ముష్కరులకు అందించేందుకు డ్రోన్లు, ఇతర వ్యవస్థల ద్వారా కశ్మీర్లోకి భారీగా ఆయుధాలు చేరవేస్తున్నట్లు నిఘా వర్గాలు పేర్కొన్నాయి. దేశంలోని అన్ని ప్రాంతాలకు చొచ్చుకెళ్లేందుకు ప్రయత్నిస్తున్నట్లు వెల్లడించాయి. ఇందుకోసం పాక్ ఆర్మీ, ఐఎస్ఐ, ఉగ్రవాదులు ఏకమై ముష్కరులను సమీకరిస్తున్నట్లు వివరించాయి. ఆయుధాల పంపిణీకి పీఓకే వద్ద అల్బదర్-తాలిబన్ కమాండర్ హమీద్ఖాన్ రే.. భారీ డంప్ ఏర్పాటు చేసినట్లు నిఘా అధికారులు హెచ్చరించారు.
కుట్ర భగ్నం..
ఉగ్రవాదులు భారత్లోకి చొరబడేందుకు వీలుగా దాయాది సైన్యం.. పదే పదే సరిహద్దుల్లో కాల్పులకు తెగబడుతున్నట్లు నిఘా వర్గాలు తెలిపాయి. ఆదివారం కూడా రావి నది ద్వారా రూ. 250 కోట్ల విలువైన 60 కిలోల హెరాయిన్ను భారత్కు పంపేందుకు పాక్ చేసిన కుట్రను బీఎస్ఎప్ జవాన్లు భగ్నం చేశారు.
ఇదీ చదవండి: డిసెంబరు కల్లా కొవిడ్-19 వ్యాక్సిన్‌!
