దేశవ్యాప్తంగా వలస కూలీలకు శాపంగా మారిన లాక్డౌన్.. ఛత్తీస్గఢ్కు చెందిన 'లక్ష్మీ దాస్' అనే దివ్యాంగుడి పాలిట మాత్రం వరమైంది. సరిగ్గా పదేళ్ల క్రితం ఇంటి నుంచి తప్పిపోయిన అతను లాక్డౌన్ పుణ్యమా అని తిరిగి తన కుటుంబాన్ని కలుసుకున్నాడు.
పుట్టుకతోనే మూగ, చెవిటి అయిన దాస్ను తిరిగి తన కుటుంబంతో కలిపేందుకు మధ్యప్రదేశ్లోని బర్వాని జిల్లా సెధ్వాకు చెందిన పోలీసు ఇన్స్పెక్టర్ వినోద్ కుమార్ యాదవ్ ప్రత్యేక శ్రద్ధ తీసుకున్నారు. సామాజిక మాధ్యమాల్లో దివ్యాంగుడి ఫొటోను షేర్ చేసి.. దాస్ తల్లిదండ్రులకు ఈ సమాచారాన్ని చేరవేశారు.
మహారాష్ట్ర నుంచి కాలినడకన వస్తుండగా.. 20ఏళ్ల దాస్ను సెధ్వాలో అదుపులోకి తీసుకున్నట్లు వెల్లడించారు యాదవ్.
" లక్ష్మీదాస్ మాట్లాడలేడు కాబట్టి, తన పేరును కాగితంపై రాయమని అడిగాను. అతను 'ఉరావే' అని రాశాడు. అది మధ్యప్రదేశ్, ఛత్తీస్గఢ్లోని కొంత మంది ఇంటిపేరని గుర్తించాను. ఆ తర్వాత ఆదాయ పన్ను శాఖ అధికారి యువరాజ్ ఠాకూర్ను సంప్రదించాను. ఆయన యువకుడి ఫొటోను రాష్ట్రంలోని వ్యాట్సాప్ గ్రూపుల్లో షేరు చేశారు."
- వినోద్ కుమార్ యాదవ్, ఇన్స్పెక్టర్
దాస్ ఫొటోను సామాజిక మాధ్యమాల్లో షేర్ చేసిన తర్వాత.. ఛత్తీస్గఢ్కు చెందిన ఓ పోలీసు కానిస్టేబుల్ నుంచి తనకు ఫోన్ వచ్చిందని తెలిపారు యాదవ్. ఆ యువకుడు కోబ్రా జిల్లాలోని శ్యాహిమూడి గ్రామానికి చెందిన వ్యక్తని, 2010 నుంచి కనిపించట్లేదని ఆ కానిస్టేబుల్ చెప్పినట్లు వెల్లడించారు.
"దివ్యాంగుడి తండ్రి 'ఇత్వార్ దాస్'తో వీడియోకాల్లో మాట్లాడాం. యువకుడి పేరు లక్ష్మీ దాస్ అని అతనే చెప్పాడు. దాస్ చిన్నప్పుడు కొంతమంది కూలీలతో కలిసి ఇంటి నుంచి వెళ్లిపోయినట్లు వివరించాడు."
- వినోద్ కుమార్ యాదవ్, ఇన్స్పెక్టర్
