దేశంలో కరోనా వైరస్ తీవ్రరూపం దాల్చుతోంది. మరణాల సంఖ్య అంతకంతకూ పెరుగుతోంది. దిల్లీ నిజాముద్దీన్లో జరిగిన తబ్లిగీ జమాత్ ప్రార్థనల్లో పాల్గొన్నవారి కారణంగా వైరస్ వ్యాప్తి మరింత విస్తరించింది. ప్రతి రాష్ట్రంలోనూ ఇలాంటి కేసులు బయటపడుతున్నాయి.
దేశంలో ఇప్పటివరకు కరోనా కారణంగా 50 మంది మరణించినట్లు కేంద్ర ఆరోగ్య శాఖ ప్రకటించింది. ప్రస్తుతం 1764 యాక్టివ్ కేసులున్నట్లు స్పష్టం చేసింది. మరో 150 మంది కోలుకున్నారు.
పద్మశ్రీ గ్రహీత మృతి..
పంజాబ్లో కరోనా సోకిన పద్మ శ్రీ పురస్కార గ్రహీత, అమృత్సర్ స్వర్ణ దేవాలయం మాజీ 'హజూరీ రాగీ' ప్రాణాలు విడిచారు. రాష్ట్రంలో కొవిడ్ మృతుల సంఖ్య ఐదుకు చేరింది. మొత్తం కేసులు 46కు చేరాయి.
62 ఏళ్ల ఆ ప్రముఖుడు ఇటీవలే విదేశాల నుంచి వచ్చారు. శ్వాస సంబంధిత సమస్యలతో బాధపడుతున్న ఆయనను మార్చి 30న అమృత్సర్ గురునానక్ దేవ్ ఆస్పత్రిలో చేర్చారు. కరోనా సోకినట్లు బుధవారం నిర్ధరణ కాగా.. సాయంత్రానికి పరిస్థితి విషమించింది. వైద్యులు వెంటిలేటర్పై ఉంచి చికిత్స అందించారు. అయినా... ఈ ఉదయం నాలుగున్నరకు తుదిశ్వాస విడిచారు.
విదేశాల నుంచి తిరిగివచ్చిన అనంతరం.. ఆయన దిల్లీ సహా ఇతర ప్రదేశాల్లో మతపరమైన కార్యక్రమాలు నిర్వహించినట్లు అధికారులు తెలిపారు. కుటుంబసభ్యులందరి నమూనాలు సేకరించనున్నట్లు వెల్లడించారు.
మరో ఇద్దరు..
మహారాష్ట్రలో తీవ్ర రూపం..
మహారాష్ట్రలో మరో ముగ్గురు వైరస్ బారిన పడ్డారు. మొత్తం బాధితుల సంఖ్య 338కి చేరినట్లు ఆరోగ్య శాఖ అధికారులు పేర్కొన్నారు. రాష్ట్రంలో మరో 16 మందిని కరోనా బలితీసుకుంది.
అక్కడ మరో 12 మంది..
మధ్యప్రదేశ్లో తాజాగా 12 మందికి కరోనా వైరస్ సోకింది. మొత్తం కేసులు 98కి చేరినట్లు ఆరోగ్య శాఖ పేర్కొంది. అయితే వీరెవ్వరూ విదేశాలకు వెళ్లినవారు కాదని స్పష్టం చేసింది. ఇప్పటివరకు రాష్ట్రంలో కొవిడ్ కారణంగా ఆరుగురు ప్రాణాలు కోల్పోయారు.
ఒక్కడే 17 మందికి...
రాజస్థాన్లో 9 కొత్త కేసులతో మొత్తం వైరస్ సోకిన వారి సంఖ్య 129కు చేరింది. ఇందులో ఏడుగురు జైపుర్ రామ్గంజ్కు చెందినవారే. ఈ ఏడుగురు రామ్గంజ్లో మొదట కరోనా సోకిన వ్యక్తితో సంబంధాలు కలిగిఉన్నవారేనని అధికారులు స్పష్టం చేశారు. ఇప్పటివరకు ఆ బాధితుడితో సన్నిహిత సంబంధాలున్న 17 మందికి వైరస్ వ్యాపించినట్లు పేర్కొన్నారు.
మర్కజ్ బాధితులే...
మణిపుర్లో కేసుల సంఖ్య రెండుకు చేరింది. కొత్తగా చేరిన బాధితుడు దిల్లీ ప్రార్థనల్లో పాల్గొన్నట్లు తెలిసింది. రాష్ట్రంలో మొత్తం అలా 10 మంది వెళ్లిరాగా.. 8 మందికి నెగిటివ్గా తేలింది.
అసోంలో మరో ముగ్గురికి కరోనా సోకగా.. మొత్తం బాధితుల సంఖ్య 16కు చేరింది. వీరందరూ మర్కజ్ ప్రార్థనలకు వెళ్లి వచ్చినవారేనని రాష్ట్ర ఆరోగ్య శాఖ మంత్రి హిమంత విశ్వ శర్మ తెలిపారు.
రాష్ట్రం నుంచి 347 మంది దిల్లీ మర్కజ్కు వెళ్లారని.. అందులో 230 మందిని గుర్తించి క్వారంటైన్లో ఉంచినట్లు పేర్కొన్నారు. మిగతావారి ఆచూకీ తెలియలేదని, వారి కుటుంబసభ్యులూ సహకరించట్లేదని స్పష్టం చేశారు.
