కొవిడ్-19 వ్యాక్సిన్లు తుది దశ ప్రయోగాల్లో ఉన్న సందర్భంగా పంపిణీకి సిద్ధమవుతోంది కేంద్రం. అన్ని సౌకర్యాలను వినియోగించుకోవాలని యోచిస్తోంది. ప్రస్తుతం ఉన్న ఆరోగ్య సేవల్లో ఎలాంటి రాజీ లేకుండా కొవిడ్ వ్యాక్సిన్ పంపిణీ, నిర్వహణ కోసం ఆరోగ్య వ్యవస్థను.. కేంద్ర ఆరోగ్య శాఖ భాగస్వామ్యంతో నిపుణుల బృందం సిద్ధం చేస్తోందని కేంద్ర ప్రభుత్వ ప్రధాన శాస్త్రీయ సలహాదారుడు (పీఎస్ఏ) ప్రొఫెసర్ కే విజయ్ రాఘవన్ వెల్లడించారు. కొవిడ్ మహమ్మారి.. పరిశోధనా కేంద్రాలు-పరిశ్రమ, పరిశ్రమ-సమాజం మధ్య అసాధారణ సహకారాన్ని ప్రేరేపించిందని నొక్కి చెప్పారు.
" ప్రస్తుత ఆరోగ్య సేవలకు ఎలాంటి ఆటంకం కలగకుండా వ్యాక్సిన్ పంపిణీకి ప్రణాళికలు రచిస్తోంది నిపుణలు బృందం. పెద్దఎత్తున వ్యాక్సిన్ పంపిణీ కార్యక్రమానికి.. గతంలో నిర్వహించి సార్వత్రిక ఎన్నికలు, టీకాల పంపిణీ అనుభవాలను వినియోగించుకొనున్నాం."
- విజయ్ రాఘవన్, కేంద్ర ప్రభుత్వ ప్రధాన శాస్త్రీయ సలహాదారు
నవంబర్ 26న వర్చువల్గా జరిగిన గ్లోబల్ ఇన్నోవేషన్, టెక్నాలజీ అలియన్స్(జీఐటీఏ) 9వ వ్యవస్థాపక దినోత్సవంలో ప్రసంగించిన సందర్భంగా ఈ మేరకు వెల్లడించారు రాఘవన్. ప్రపంచ శక్తిగా ఎదిగేందుకు, అంతర్జాతీయంగా సహకారాన్ని పెంపొందించేందుకు సాంకేతికత ఎంతో ఉపయోగపడుతుందన్నారు.
ఇదీ చూడండి:'భారతీయులందరికీ టీకా అందేది అప్పుడే'
