ఉత్తర్ప్రదేశ్లోకి ఇద్దరు ఐసిస్ ఉగ్రవాదులు చొరబడినట్లు పోలీసులు వెల్లడించారు. వీళ్లు నేపాల్ పారిపోయేందుకు యత్నిస్తున్నట్లు నిఘావర్గాల సమాచారం ఉందని తెలిపారు. ముష్కరులు తప్పించుకోకుండా భారత్-నేపాల్ సరిహద్దుల్లోని మహారాజ్గంజ్, కుశినగర్, సిద్ధార్థ్ నగర్ల్లో హై అలర్ట్ ప్రకటించినట్లు స్పష్టం చేశారు.
"ఇద్దరు వాంటెడ్ ఐసిస్ ఉగ్రవాదులు అబ్దుల్ సమద్, ఇలియాస్లు ఉత్తర్ప్రదేశ్లో చొరబడ్డారు. ఇక్కడ నుంచి వారు నేపాల్ పారిపోయేందుకు ప్రయత్నిస్తున్నారని సమాచారం."- అశుతోష్ కుమార్, ఐజీ (బస్తీ రేంజ్)
ఈ ఇద్దరు వాంటెడ్ ఉగ్రవాదులను గుర్తించేందుకుగాను వారిద్దరి చిత్రాలను భారత్-నేపాల్ సరిహద్దు ప్రాంతాల్లో విరివిగా పంపిణీ చేసినట్లు ఐజీ అశుతోష్ కుమార్ వెల్లడించారు. ప్రస్తుతం ముష్కరులు ఎలాంటి దుస్తులు, వేషధారణలో ఉన్నారనే సమాచారం లేదని ఐజీ తెలిపారు.
బంగాల్లో
ఇంతకుముందు ఈ ఇద్దరు ముష్కరులను బంగాల్ సిలిగురిలో గుర్తించారు. పోలీసులు ఈ ఇద్దరినీ ఐసిస్కు చెందిన ఉగ్రవాదులుగా అనుమానిస్తున్నారు.
భారత్-నేపాల్ల మధ్య 1,751 కిలోమీటర్ల పొడవున సరిహద్దు ఉంది. దీనిలో ఉత్తర్ప్రదేశ్ 599.3 కి.మీ సరిహద్దు కలిగి ఉంది. లిపిభిత్, లఖింపుర్ ఖేరీ, బహ్రాయిచ్, శ్రావస్తి, సిద్ధార్థ్నగర్, మహారాజ్గంజ్ జిల్లాలు నేపాల్తో సరిహద్దును పంచుకుంటున్నాయి. ఉగ్రవాదులను భారత్లోకి పంపించడానికిగాను ఈ ప్రాంతాన్ని గతంలో పాకిస్థాన్ వినియోగించుకుంది. అయితే భారత్ సరిహద్దు దళాలు పలువురు పాక్ ఉగ్రవాదులను చాలాసార్లు పట్టుకున్నాయి.
ఇదీ చూడండి: సీఏఏపై ప్రజలను తప్పుదోవ పట్టిస్తున్నారు: షా
