ఉత్తర్ప్రదేశ్ వారణాసిలోని గ్యాన్వాపి మసీదుపై భారత సర్వే విభాగం (ఏఎస్ఐ) చేస్తున్న సర్వేపై స్టే విధించింది అలహాబాద్ హైకోర్టు. సర్వేకు అనుకూలంగా వారణాసి దిగువకోర్టు ఇచ్చిన అనుమతులను నిలిపివేస్తూ.. గురువారం ఈ ఆదేశాలు జారీ చేసింది.
సర్వే దేనికి?
గ్యాన్వాపి మాసీదు కాంప్లెక్స్ ఉన్న ప్రాంతంలో ఇంతకు ముందు ఏదైనా ఆలయం ఉండేదా? అని తెలుసుకునేందుకు వారణాసి ఫాస్ట్రాక్ కోర్టు.. సర్వే చేసేందుకు ఏప్రిల్ 8న ఏఎస్ఐకు అనుమతించింది. దీనిపై ఉత్తర్ప్రదేశ్ సున్నీ వక్ఫ్ బోర్డ్ హై కోర్టును ఆశ్రయించింది. తాజాగా ఈ కేసుపై పిటిషనర్, కేంద్ర, రాష్ట్ర ప్రభుత్వాల వాదనలు విన్న ధర్మాసనం.. సర్వేపై స్టే విధించింది. జస్టిస్ ప్రకాశ్ పాడియా నేతృత్వంలోని ధర్మాసం ఈ కేసు తీర్పును రిజర్వ్ చేసింది.
సుదీర్ఘ వివాదం..
కాశీ విశ్వనాథ్ ఆలయం, గ్యాన్వాపి మసీదు స్థల వివాదం సుదీర్ఘకాలంగా కొనసాగుతోంది. ఈ సమస్యకు పరిష్కారం కోసం 2019, డిసెంబర్లో స్థానిక లాయర్ వీఎస్ రాస్తోగి.. వారణాసి కోర్టులో పిటిషన్ దాఖలు చేశారు. మొఘల్ రాజు ఔరంగాజేబ్ 1664లో 2వేల ఏళ్ల నాటి కాశీ విశ్వనాథ్ ఆలయంలోని కొంత భాగాన్ని కూల్చివేసి మసీదును నిర్మించాడని పిటిషనర్ పేర్కొన్నారు.
భారత సర్వే విభాగం(ఏఎస్ఐ)తో మసీదు స్థలాన్ని మొత్తం సర్వే చేయాలని న్యాయవాది కోరారు. అయితే.. దీనిపై అభ్యంతరం వ్యక్తం చేస్తూ అంజుమ్ ఇంతెజామియా మసీదు కమిటీ పిటిషన్ దాఖలు చేసింది. ఈ క్రమంలోనే ఈ ఏడాది ఏప్రిల్లో భారత సర్వే విభాగానికి అనుమతులు ఇచ్చింది వారణాసి కోర్టు. ఐదుగురు సభ్యులతో కమిటీని ఏర్పాటు చేయాలని ఉత్తర్ప్రదేశ్ ప్రభుత్వాన్ని ఆదేశించింది.
ఇదీ చదవండి: ఎన్నికల ముందు కలకలం.. అసెంబ్లీ వెబ్సైట్ హ్యాక్!
