వీడని ప్రతిష్టంభన- అయినా ఐదు బిల్లులకు ఆమోదం!

గందరగోళ పరిస్థితుల మధ్యే పార్లమెంట్ ఉభయ సభల కార్యకలాపాలు కొనసాగాయి. విపక్షాల ఆందోళన నడుమ మూడు బిల్లులు రాజ్యసభ, రెండు బిల్లులు లోక్​సభ ఆమోదం పొందాయి. విపక్షాల తీరు పట్ట రాజ్యసభ ఛైర్మన్ వెంకయ్య నాయుడు అసంతృప్తి వ్యక్తం చేయగా.. సభ సజావుగా జరగకపోవడానికి కారణం ప్రభుత్వమేనని ప్రతిపక్షాలు ధ్వజమెత్తాయి.

పార్లమెంట్​ వర్షాకాల సమావేశాల్లో విపక్షాల ఆందోళనలు కొనసాగుతూనే ఉన్నాయి. పెగసస్, సాగు చట్టాలు, ధరల పెరుగుదల అంశాలపై చర్చకు పట్టుబడుతూ.. బుధవారం సైతం విపక్ష సభ్యులు గందరగోళం సృష్టించారు. బిగ్గరగా నినాదాలు చేస్తు సభా కార్యకలాపాలకు అంతరాయం కలిగించారు. అయితే, ఈ ఆందోళనల మధ్యే రాజ్యసభ మూడు, లోక్​సభ రెండు బిల్లులకు ఆమోదం తెలిపాయి. అనంతరం గురువారానికి వాయిదా పడ్డాయి.

ఉదయం 11 గంటలకు సమావేశమైన ఉభయసభల్లో.. ఆద్యంతం వాయిదాల పర్వమే కొనసాగింది. పెగసస్​, వ్యవసాయ చట్టాలపై చర్చకు విపక్షాలు పట్టుబట్టడం వల్ల గందరగోళ పరిస్థితులు తలెత్తాయి. దీంతో నిమిషాల వ్యవధిలోనే సభలు వాయిదా పడ్డాయి. మధ్యాహ్నం 2గంటల వరకు రాజ్యసభ వాయిదా పడగా... ఆ లోపు లోక్​సభ మూడు సార్లు వాయిదా పడింది.

బిల్లుల ఆమోదం..

అనంతరం రెండు గంటలకు సమావేశమైన తర్వాత ఉభయ సభలు.. వాయు వేగంతో బిల్లులను ఆమోదించాయి. ఓవైపు విపక్షాల ఆందోళనలు, ప్లకార్డుల ప్రదర్శనలు కొనసాగుతున్నప్పటికీ.. బిల్లులపై అధికార పక్షం ముందుకెళ్లింది. ఫలితంగా రాజ్యసభలో మూడు, లోక్​సభలో రెండు బిల్లు ఆమోదం పొందాయి. ఇవన్నీ మూజువాణి ఓటుతోనే గట్టెక్కాయి.

ఎంపీలు సస్పెండ్

మరోవైపు, సభా వ్యవహారాలకు విఘాతం కలిగిస్తున్నారన్న కారణంతో ఆరుగురు టీఎంసీకి ఎంపీలను రాజ్యసభ ఛైర్మన్ వెంకయ్యనాయుడు ఒకరోజు పాటు సస్పెండ్ చేశారు. తొలుత వారికి హెచ్చరికలు జారీ చేసిన వెంకయ్య.. పరిస్థితి సద్దుమణగకపోవడం వల్ల.. రూల్ 255 ప్రకారం నిరసన చేస్తున్న ఎంపీలపై చర్యలు తీసుకున్నారు. వేటు పడిన టీఎంసీ ఎంపీలు పార్లమెంట్​లోనే ఆందోళనకు దిగారు. రాజ్యసభ ప్రవేశద్వారం వద్ద నినాదాలు చేశారు. వీరిని అదుపు చేసేందుకు మార్షల్స్​ను రంగంలోకి దించారు.

వెంకయ్య అసంతృప్తి

రాజ్యసభలో సభ్యుల తీరుపై ఛైర్మన్ వెంకయ్య నాయుడు తీవ్ర అసంతృప్తి వ్యక్తం చేశారు. సమావేశాలను పూర్తిగా జరగనివ్వొద్దని కొన్ని పార్టీలు కంకణం కట్టుకున్నాయని ఆవేదన వెలిబుచ్చారు. సాగు చట్టాలు, ధరల పెరుగుదల, నిరుద్యోగం వంటి అంశాలపై చర్చించేందుకు సభ్యులు సహకరించాలని కోరారు. ప్రభుత్వం, విపక్షాలు అవగాహనతో పనిచేయాలని, సభలో సాధారణ పరిస్థితులు ఉండేలా చూడాలని అభ్యర్థించారు. ఈ మేరకు సభలో గందరగోళం సృష్టిస్తున్న పార్టీల నేతలతో వెంకయ్య సమావేశమైనట్లు సంబంధిత వర్గాలు తెలిపాయి. సభలో శాంతియుతంగా ఉన్న పార్టీల ఎంపీలతోనూ భేటీ అయినట్లు వెల్లడించాయి.

ప్రభుత్వానిదే బాధ్యత: విపక్షాలు

అయితే, దేశ భద్రత విషయంలో కీలకమైన పెగసస్ సహా ఇతర సమస్యలపై చర్చించాల్సిందేనని విపక్ష పార్టీలు తమ సంయుక్త ప్రకటనలో పేర్కొన్నాయి. ఆ తర్వాత రైతుల సమస్యలపై చర్చించాలని కేంద్రానికి స్పష్టం చేసినట్లు తెలిపాయి. పార్లమెంట్​ ప్రతిష్టంభనకు విపక్షాలే కారణమంటూ ప్రభుత్వం దుష్ప్రచారం చేస్తోందని మండిపడ్డాయి. సభల అంతరాయానికి పూర్తి బాధ్యత ప్రభుత్వానిదేనని పేర్కొన్నాయి.

రాజ్యసభ ఆమోదం పొందిన బిల్లులు- వాటి వివరాలు

డిపాజిట్ ఇన్సూరెన్స్ అండ్ క్రెడిట్ గ్యారెంటీ కార్పొరేషన్ సవరణ బిల్లు

చిన్న డిపాజిటర్లకు మేలు కలిగేలా ఈ సవరణ తీసుకొచ్చినట్లు కేంద్ర ఆర్థిక మంత్రి నిర్మలా సీతారామన్ తెలిపారు. పీఎంసీ బ్యాంకు డిపాజిటర్లకు కూడా ఈ బిల్లు ద్వారా ప్రయోజనం కలుగుతుందని నిర్మలా సీతారామన్ తెలిపారు.

బ్యాంకులు తాత్కాలికంగా నగదు జారీ చేయలేని పరిస్థితుల్లోనూ.. డిపాజిటర్లు తమ డబ్బును పొందేలా బిల్లును రూపొందించారు. ఆర్థిక అవకతవకలు సహా ఇతర కారణాలతో ఆర్బీఐ మారటోరియం ఎదుర్కొంటున్న బ్యాంకుల్లోని డిపాజిట్‌దారుల సొమ్ముకు ఈ బిల్లు భద్రత కల్పిస్తుంది. అలాంటి బ్యాంకుల్లోని డిపాజిట్‌దారులు 90 రోజుల్లో గరిష్ఠంగా రూ.5 లక్షల వరకు తమ సొమ్ము వెనక్కి తీసుకునేందుకు వీలు ఉంటుంది. డిపాజిట్లపై బీమా ఉన్న నగదును డీఐసీజీసీ ద్వారా అందిస్తారు.

లిమిటెడ్ లయబిలిటీ పార్ట్​నర్​షిప్ సవరణ బిల్లు

స్టార్టప్ కంపెనీలకు ఊతమిచ్చేలా, ఈజ్ ఆఫ్ డూయింగ్ బిజినెస్​ను మరింత విస్తృతం చేసేలా ఈ బిల్లును రూపొందించినట్లు కేంద్రం తెలిపింది.

2008 ఎల్ఎల్​పీ చట్టంలో పేర్కొన్న 12 నేరాలను అందులో నుంచి తొలగిస్తూ.. బిల్లును రూపొందించారు. ఈ క్రిమినల్ నేరాలను ఇకపై సివిల్ డిఫాల్ట్​లుగా పరిగణిస్తారు. దీంతోపాటు.. శిక్షార్హమైన నిబంధనలను 22కు, కాంపౌండబుల్ నేరాలను 7కు, నాన్ కాంపౌండబుల్ నేరాలను మూడుకు తగ్గిస్తూ బిల్లు తయారు చేశారు. అంతర్గత యంత్రాంగం ద్వారా పరిష్కరించుకునే డీఫాల్ట్​లను 12కు కుదించారు. 'చిన్న కంపెనీ'ల తరహాలోనే 'చిన్న లిమిటెడ్ లయబిలిటీ పార్ట్​నర్​షిప్' అనే విధానాన్ని సైతం ఈ బిల్లు ద్వారా పరిచయం చేశారు.

దీనితో పాటు ఎయిర్​పోర్ట్ ఎకనామిక్ రెగ్యులేటరీ అథారిటీ ఆఫ్ ఇండియా సవరణ బిల్లును సైతం రాజ్యసభ ఆమోదించింది.

లోక్​సభలో ఆమోదం పొందిన బిల్లులు

దిల్లీ-ఎన్​సీఆర్ ప్రాంతాల్లో వాయు నాణ్యత నిర్వహణ కోసం కమిషన్ ఏర్పాటు బిల్లు

దిల్లీ సహా పరిసర ప్రాంతాల్లో కాలుష్యాన్ని నియంత్రించేందుకు ఈ బిల్లును ప్రవేశపెట్టారు. దీనిపై గతంలోనే ఆర్డినెన్స్ జారీ అయింది. రాజ్యసభలోనూ ఈ బిల్లు ఆమోదం పొందితే.. ఆర్డినెన్సు స్థానాన్ని భర్తీ చేస్తుంది.

కాలుష్య నివారణలో కేంద్ర మంత్రిత్వ శాఖలు, రాష్ట్ర ప్రభుత్వం, స్థానిక సంస్థల మధ్య సమన్వయాన్ని తీసుకొచ్చేందుకు ఈ బిల్లు రూపొందించారు. ఇందుకోసం స్వయంప్రతిపత్తితో కూడిన యంత్రాంగాన్ని ఏర్పాటు చేయనున్నారు.

దీనితో పాటు కోకోనట్ డెవలప్​మెంట్ బోర్డు సవరణ బిల్లును సైతం లోక్​సభ ఆమోదించింది.