Kanwar Yatra 2024 : కావడి యాత్ర మార్గంలో ఆహార దుకాణాలపై యజమానుల పేర్లు ప్రదర్శించాలని యూపీ సర్కార్‌ జారీ చేసిన ఉత్తర్వులపై సోమవారం సుప్రీంకోర్టులో విచారణ జరగనుంది. ఓ స్వచ్ఛంద సంస్థ దాఖలు చేసిన ఈ పిటిషన్‌పై, జస్టిస్‌ హృషికేశ్‌ రాయ్‌, జస్టిస్‌ ఎన్వీఎన్ భట్‌ల ధర్మాసనం విచారణ చేయనుంది.
నేటి నుంచే కావడి యాత్ర
సోమవారం నుంచే కావడి యాత్ర ప్రారంభం అవుతుంది. ఏటా శ్రావణ శుక్రవారంలో జరిపే ఈ యాత్రలో శివభక్తులు నెల రోజులపాటు గంగానది జలాలను కావిళ్లతో సేకరించి స్వస్థలాలకు తీసుకువెళ్తారు. యాత్రకు వచ్చే భక్తుల కోసం అధికారులు పటిష్టమైన భద్రతా ఏర్పాట్లు చేశారు. ఈ నేపథ్యంలోనే కావడి యాత్ర మార్గంలో ఆహార దుకాణాలపై యజమానుల పేర్లు ప్రదర్శించాలని ఉత్తర్‌ప్రదేశ్‌ ప్రభుత్వం ఇటీవల ఉత్తర్వులు జారీ చేసింది. ఈ నిర్ణయాన్ని బీజేపీ, వీహెచ్పీ స్వాగతించగా, విపక్షాలతోపాటు ఎన్డీఏ భాగస్వామ్య పక్షాలైన ఎల్జేపీ, జేడీయూ, ఆర్ఎల్డీ పార్టీలూ తప్పుపట్టాయి.
