దారి విషయంలో బెదిరించిన వైసీపీ నేతలు-పెట్రోల్ పోసుకుని నిప్పంటించుకున్న యువకుడు

Young Man Attempt to Suicide Due to YSRCP Leaders Harassment: ప్రజలు చిత్తుగా ఓడించినా వైఎస్సార్​సీపీ నాయకుల ఆగడాలు ఏమాత్రం తగ్గలేదు. క్షేత్రస్థాయిలో ఇప్పటికీ ప్రజలపై పెత్తనం చేస్తున్నారు. చెప్పినట్లు వినకుంటే బరితెగించి దాడులకు పాల్పడుతున్నారు. శ్రీ సత్యసాయి జిల్లా బుక్కపట్నం మండలం మారాలకు చెందిన టీడీపీ వర్గీయుడు మేకల గౌతమ్ వైఎస్సార్​సీపీ దాడుల భయంతో ఆత్మహత్యకు యత్నించాడు. ప్రస్తుతం బెంగళూరు ఆసుపత్రిలో చావుబతుకుల మధ్య కొట్టుమిట్టాడుతున్నాడు. ఇంటి దగ్గర దారి గొడవలో గౌతమ్ తండ్రి మేకల నారాయణస్వామిపై ఇటీవల వైఎస్సార్​సీపీ నాయకులు దాడి చేశారు. పోలీసులకు ఫిర్యాదు చేసేందుకు వెళుతుండగా దారి మధ్యలో అటకాయించిన వైఎస్సార్​సీపీ నాయకులు రామ్మోహన్, గోపి కేసు పెడితే హతమరుస్తామని బెదిరించారు. వైఎస్సార్​సీపీ హయాంలో క్షేత్ర సహాయకుడిగా ఉంటూ దందాలకు పాల్పడిన రామ్మోహన్ బెదిరింపులతో భయపడిన నారాయణస్వామి కేసు పెట్టకుండానే వెనుదిరిగారు. ఆ తర్వాత పీర్ల పండుగ రోజు కూడా గొడవ జరిగింది. వైఎస్సార్​సీపీ దురాగతాలపై తీవ్ర ఆవేదన చెందిన గౌతమ్ తమకు న్యాయం జరిగే అవకాశం లేదంటూ పెట్రోల్ పోసుకుని నిప్పంటించుకున్నాడు.