తప్పతాగి ఆర్టీసీ బస్సులో మహిళ హల్​చల్​ - చిల్లర కోసం కండక్టర్​పై దాడి

Woman Attack On RTC Conductor In Hayathnagar :  ఆర్టీసి బస్సు కండక్టర్ మీద ఓ మహిళ దాడి చేసిన ఘటన ఆలస్యంగా వెలుగులోకి వచ్చింది. హయత్​నగర్ బస్​ డిపోకు చెందిన కండక్టర్​ను మద్యం మత్తులో  ఓ మహిళ బూతులు తిడుతూ, కాలుతో తన్నుతూ దుర్భాషలాడింది. మొదటి ట్రిప్పులో తన దగ్గర చిల్లర లేదని కండక్టర్‌ విన్నవించడంతో ఆ మహిళా వినకుండా గొడవకు దిగింది. బస్సులోని తోటి మహిళా ప్రయాణికులు ఎంత చెప్పినా సదరు మహిళ పట్టించుకోకుండా కండక్టర్​పై దాడి చేసింది. ఈ ఘటనను టీఎస్‌ ఆర్టీసీ యాజమాన్యం తీవ్రంగా ఖండిచింది. దీనిపై ఎల్బీనగర్‌ పోలీస్‌ స్టేషన్‌లో ఆర్టీసీ అధికారులు ఫిర్యాదు చేశారు. పోలీసులు కేసు నమోదు చేసుకొని దర్యాప్తు చేస్తున్నారు.

Sajjanar Reacts TO Woman Attack On RTC Conductor : మరోవైపు ఈ ఘటనపై ఆర్టీసీ ఎండీ సజ్జనార్ ఎక్స్  వేదికగా స్పందించారు. నిబద్దతతో సమర్థంగా విధులు నిర్వహిస్తున్న సిబ్బందిపై ఇలాంటి ఘటనలకు పాల్పడితే ఏమాత్రం ఉపేక్షించబోమని స్పష్టం చేశారు. టీఎస్​ఆర్టీసీ సిబ్బంది విధులకు ఆటకం కలిగించి దాడులకు దిగే వ్యక్తులపై చట్టప్రకారం చర్యలు తీసుకుంటామని హెచ్చరించారు. టీఎస్‌ఆర్టీసీ సిబ్బంది చాలా ఓపిక, సహనంతో విధులు నిర్వహిస్తున్నారని వారికి సహకరించి క్షేమంగా గమ్యస్థానాలకు చేరుకోవాలని విజ్ఞప్తి చేశారు.