ఆర్టీసీ ఉద్యోగుల పీఆర్సీ అంశాన్ని రేవంత్​ రెడ్డి దృష్టికి తీసుకెళ్తా : మంత్రి పొన్నం

TSRTC Grand Festival Challenge : ఆర్టీసీ ఉద్యోగుల పీఆర్సీ అంశాన్ని ముఖ్యమంత్రి రేవంత్​ రెడ్డి దృష్టికి తీసుకెళ్లి పరిష్కారానికి కృషి చేస్తానని రవాణా శాఖ మంత్రి పొన్నం ప్రభాకర్ పేర్కొన్నారు. హైదరాబాద్​ బాగ్​ లింగంపల్లిలోని ఆర్టీసీ కళాభవన్​లో రాష్ట్ర రోడ్డు రవాణా సంస్థ గ్రాండ్ ఫెస్టివల్ ఛాలెంజ్ 2023-24 ఉత్తమ ఉద్యోగులు, అధికారులకు సంస్థ ఎండీ సజ్జనార్​తో కలిసి మంత్రి పురస్కారాలను ప్రదానం చేశారు.

ఈ సందర్భంగా ప్రజలపై భారం పడకుండా ఆర్టీసీ ఆదాయాన్ని పెంచే విధంగా కృషి చేయాలని మంత్రి సూచించారు. మహాలక్ష్మి పథకం విజయవంతంగా ముందుకు తీసుకెళ్తున్న ఆర్టీసీ ఉద్యోగులకు ఆయన కృతజ్ఞతలు తెలిపారు. ఈ క్రమంలోనే అత్యుత్తమ విధులు నిర్వహిస్తున్న మహిళా ఉద్యోగులకు మహాలక్ష్మి పథకం పేరిట ప్రతి ఏడాది అవార్డులు ఇవ్వాలని ఆర్టీసీ ఎండీ సజ్జనార్​కు మంత్రి సూచించారు. ఇలాంటి కార్యక్రమాలను భవిష్యత్తులో సకాలంలో చేసుకుందామని వివరించారు. ఈ క్రమంలోనే ఆర్టీసీలో త్వరలోనే నియామకాలు జరగబోతున్నాయని మంత్రి స్పష్టం చేశారు.