కూంబింగ్ వెళ్లి అడవిలోని చిక్కుకున్న తెలంగాణ పోలీసులు - Police Combing Team stuck in forest

Telangana Police Force Stuck in Forest : తెలంగాణ ఛత్తీస్​గఢ్ సరిహద్దులో కూంబింగ్​కు వెళ్లిన రాష్ట్ర పోలీసు బలగాలు వరద ఉద్దృతి ధాటికి వాగులు దాటలేక అడవిలోనే సాయం కోసం నిరీక్షించారు. ఈ ఘటన ములుగు జిల్లాలో జరిగింది. ఈ విషయం తెలుసుకున్న రాష్ట్ర పోలీసులు హెలికాప్టర్ ద్వారా బలగాల కోసం గాలించి వారిని గుర్తించారు. దాదాపు 20 మందిని సురక్షితంగా వాజేడు మండలం పూసూరు వంతెన వద్దకు తీసుకొచ్చారు.  

Police Combing Team Stuck in Forest in Mulugu : అక్కడి నుంచి రోడ్డు మార్గాన వారిని ములుగు జిల్లాలోని ఏటూరు నాగారం పీహెచ్​సీకి తరలించారు. గత మూడ్రోజుల నుంచి కురుస్తున్న వర్షానికి పలు ప్రాంతాలు జలమయమయ్యాయి. ఈ క్రమంలో రాష్ట్ర సరిహద్దులో కూంబింగ్​కు వెళ్లిన తెలంగాణ పోలీసుల బలగాలు సైతం ఇబ్బందులకు గురైంది. రాష్ట్రంలో ఎడతెరిపి లేకుండా వర్షం కురుస్తుండడంతో ఇప్పటికే వాతావరణ శాఖ పలు జిల్లాలకు హెచ్చరికలు జారీ చేసింది.