రైతుల ఆస్తులు దోచుకునేందుకు జగన్‌ ల్యాండ్‌ టైట్లింగ్‌ యాక్ట్ : టీడీపీ నేత ఆనం - Aanam Ramnarayana Reddy

TDP Leader Aanam Ramnarayana Reddy Comment Land Titling Act : రైతుల ఆస్తులు దోచుకునేందుకు సీఎం జగన్‌ ల్యాండ్‌ టైట్లింగ్‌ పేరిట కొత్త జీవోను తెచ్చారని నెల్లూరు జిల్లా ఆత్మకూరు తెలుగుదేశం అభ్యర్థి ఆనం రాంనారాయణరెడ్డి మండిపడ్డారు. ఇక భూ హక్కుకు సంబంధించి అసలైన పత్రాలు జగన్ కార్యాలయంలో ఉంటాయని, జిరాక్స్​లు మాత్రమే మన చేతిలో ఉంటాయని ఆయన తెలిపారు. ఆత్మకూరు మండలంలోని నల్లపురెడ్డిపల్లి, మురగళ్ళ, కనుపూరుపల్లి, బండారుపల్లి గ్రామాల్లో కార్యకర్తలతో కలిసి ప్రచారం చేశారు. ప్రచారంలో స్థానిక నాయకులు, మహిళలు ఆయనకు ఘనస్వాగతం పలికారు.

సీఎం జగన్​ తీసుకొచ్చిన ల్యాండ్​ టైటిలింగ్​ యాక్టు వల్ల భూములకు సంబంధించిన స్టాంపు పేపర్లు ఉండవని, కేవలం జిరాక్స్​లు మాత్రమే ఉంటాయని ఆనం నారాయణ రెడ్డి పేర్కొన్నారు. భూమికి సంబంధించిన పాసు పుస్తకం అంటే రాజముద్ర లాంటిదని, అది రైతుల హక్కు పత్రమని తెలియజేశారు. అలాంటి హక్కు పత్రంపై కోట్ల రూపాయలు ఖర్చు పెట్టి సీఎం జగన్​ తన ఫొటో వేయించుకున్నారని ఈ సందర్భంగా ఆనం మండిపడ్డారు.