మా పొట్ట కొట్టకండి - ఎస్​ఆర్​నగర్​ ట్రాఫిక్ పీఎస్ ముందు చిరువ్యాపారుల నిరసన

Ameerpet Street Vendors in Police Station : షాపింగ్ మాల్స్ ముందు వాహనాలు ఆగి ట్రాఫిక్ జామ్ అయితే పట్టించుకోకుండా తమలాంటి చిరు వ్యాపారులను ఎందుకు వేధిస్తున్నారంటూ ఎస్​ఆర్​నగర్ ట్రాఫిక్ పీఎస్ ముందు వ్యాపారులు ఆందోళనకు దిగారు. పెద్ద పెద్ద షాపింగ్ మాల్స్ వల్లే అమీర్​ పేట ప్రాంతంలో భారీగా ట్రాఫిక్ జామ్ జరుగుతోందని వారు ఆరోపించారు. తాము రోడ్డు పక్కన పూలు, పండ్లు, కూరగాయాలు, పూజకు సంబంధించిన సామాగ్రి అమ్ముకుంటూ జీవిస్తుంటే ట్రాఫిక్​కు ఆటంకం కలిగిస్తున్నారని తమ సామాన్లను ట్రాఫిక్ పోలీసులు లాక్కెళ్లుతున్నారని వాపోయారు. 

అమీర్​పేట్​లో తమ లాంటి వ్యాపారులు 200 కుటుంబాల వరకు ఇలా చిరు వ్యాపారం పైనే ఆధారపడుతున్నామని తెలిపారు. పార్కింగ్ సౌకర్యం లేక ట్రాఫిక్ సమస్యలు వస్తున్నాయని ఆ విషయంపై దృష్టి సారించకుండా తమ సామాన్లు లాక్కొంటూ తమ పొట్ట కొడుతున్నారని చిరువ్యాపారులు ఆవేదన వ్యక్తం చేశారు. ఇకనుంచైనా తమను వేధించకుండా ట్రాఫిక్ సమస్యపై దృష్టి సారించాలని వారు ట్రాఫిక్ ఉన్నతాధికారులకు విజ్ఞప్తి చేశారు.