పదవినైనా వదలుకుంటా గానీ స్థలాన్ని పోనివ్వను- స్పీకర్ అయ్యన్న సంచలన వ్యాఖ్యలు - SPEAKER AYYANNA FIRE

Speaker Ayyanna Patrudu Fire on Narsipatnam RTC Space Lease in Anakapalli District : ప్రజలకు చెందిన ఆర్టీసీ స్థలాన్ని లీజుకివ్వడంపై గత ప్రభుత్వం తీసుకున్న నిర్ణయాన్ని వెనక్కి తీసుకోవాలని స్పీకర్​ అయ్యన్న పాత్రుడు కోరారు. ఈ స్థలాన్ని కాపాడుకోవడం కోసం అవసరమైతే తన స్పీకర్ పదవిని వదులుకోవడానికి కూడా సిద్ధంగా ఉన్నానని వెల్లడించారు. అనకాపల్లి జిల్లా నర్సీపట్నం ఆర్టీసీ డిపోను సంబంధిత అధికారులతో కలిసి ఆయన సందర్శించారు.

నర్సీపట్నంలో ఎకరం 70 సెంట్ల ఆర్టీసీ స్థలాన్ని షాపింగ్​ కాంప్లెక్స్​ నిర్మాణానికి వైఎస్సార్సీపీ ప్రభుత్వం ప్రైవేటు వ్యక్తులకు లీజుకు ఇచ్చింది. ఈ విషయాన్ని అయ్యన్నపాత్రుడు ముందు నుంచి వ్యతిరేకిస్తూ వచ్చారు. ఇప్పుడు అక్కడ నిర్మాణాలు ప్రారంభించేందుకు లీజుదారులు సిద్ధపడిన విషయంపై ఆయన మండిపడ్డారు. ఈ నేపథ్యంలోనే ఆర్టీసీ ప్రాంతాన్ని ఆయన వెళ్లి పరిశీలించారు. ప్రైవేట్​ వ్యక్తులతో డిపో మేనేజర్​ కుమ్మక్కై కట్టడాలకు సహకరిస్తే సహించేది లేదని హెచ్చరించారు. ఈ విషయాన్ని సీఎం చంద్రబాబు నాయుడు దృష్టికి తీసుకువెళ్తానని అయ్యన్న తెలిపారు.