నిండుకుండను తలపిస్తున్న నాగార్జునసాగర్ జలాశయం - రెండు గేట్లు ఎత్తి నీటి విడుదల - Nagarjuna Sagar Project Gates Open

Nagarjuna Sagar Project Gates Open : ఎగువ నుంచి వస్తున్న వరద ప్రవాహంతో నాగార్జున సాగర్ ప్రాజెక్టు నిండుకుండను తలపిస్తోంది. వరద పెరగడంతో రెండు క్రస్ట్​ గేట్లను 5 అడుగుల మేర ఎత్తి 16,200 క్యూసెక్కుల నీటిని దిగువకు విడుదల చేస్తున్నారు. సాగర్ ప్రస్తుత, పూర్తిస్థాయి నీటిమట్టం 590 అడుగులుగా ఉంది. జలాశయం ప్రస్తుత, పూర్తి నిల్వ సామర్థ్యం 312.50 టీఎంసీలుగా ఉంది. జలాశయానికి ఇన్​ఫ్లోగా 64000 క్యూసెక్కుల నీరు ఎగువ నుంచి వస్తోంది. అంతే మొత్తంలో ప్రధాన విద్యుత్​ ఉత్పత్తి కేంద్రం ద్వారా 28వేల క్యూసెక్కుల నీరు, సాగర్ కుడి ఎడమ కాలువలకు సాగునీరు 16వేల క్యూసెక్కుల నీరు విడుదల చేస్తున్నారు. సాగర్ నిండుకుండలా మారడంతో ఈ నెలలో మూడో సారి గేట్లను ఎత్తారు. మరోవైపు శ్రీరాంసాగర్​ ప్రాజెక్టుకు 31,202 క్యూసెక్కుల వరద ప్రవాహం వచ్చి చేరుతోంది. జలశయం పూర్తిస్థాయి నీటిమట్టం 1091 అడుగులు కాగా ప్రస్తుత నీటిమట్టం 1083 అడుగులుగా నమోదైంది.