నాన్​స్టాప్​గా 12 గంటలు ఈత- తల్లీకొడుకుల రేర్​ ఫీట్​- ఆసియా రికార్డ్స్​లో చోటు - Mother Son Non Stop Swimming

Mother Son 12 Hours Non Stop Swimming : కర్ణాటక బెళగావికి చెందిన తల్లీకొడుకులు 12 గంటలపాటు నిరంతరాయంగా నీటిలో ఈది అద్భుత ఫీట్​ సాధించారు. వర్షం కురుస్తున్నా లెక్కచేయకుండా స్విమ్మింగ్​ చేసి- ఆసియా బుక్​ ఆఫ్​ రికార్డ్స్​, ఇండియా బుక్​ ఆఫ్​ రికార్డ్స్​లో చోటు సంపాదించుకున్నారు. ఈ అరుదైన ఫీట్​ సాధించిన తల్లీకొడుకులను అందరూ అభినందిస్తున్నారు.

జ్యోతి కోరి అనే మహిళ స్థానిక కొడోళి ప్రైమరీ హెల్త్​ సెంటర్​లో ల్యాబ్​ టెక్నీషియన్​గా పనిచేస్తోంది. ఆమె కుమారుడు విహాన్​ సెయింట్​ జేవియర్స్​ స్కూల్​లో 6వ తరగతి చదువుతున్నాడు. స్వతహాగా స్విమ్మర్​ అయిన జ్యోతి, కుమారుడికి ఈతలో మెళకువలు నేర్పింది. తల్లిని చూసి విహాన్​ స్విమ్మింగ్​పై మక్కువ పెంచుకున్నాడు. ఈ క్రమంలో బెళగావిలోని సువర్ణ JNMC స్విమ్మింగ్ పూల్ వద్ద స్విమ్మర్స్ క్లబ్ ఆఫ్ బెల్గామ్‌, అక్వేరియస్ స్విమ్ క్లబ్ బెల్గామ్‌ సంయుక్తంగా నాన్‌స్టాప్ స్విమ్మింగ్ రిలే నిర్వహించాయి. ఈ రిలేలో పాల్గొన్న జ్యోతి, విహాన్​, నాన్​స్టాప్​గా 12 గంటల 22 నిమిషాలు ఈదారు. జ్యోతి 12 కిలోమీటర్లు ఈదగా, విహాన్​ 18 కిలోమీటర్లు స్విమ్మింగ్​ చేసి రికార్డ్​ సృష్టించాడు. అనంతరం జ్యోతి, విహాన్​కు ఆసియా బుక్ ఆఫ్ రికార్డ్స్, ఇండియా బుక్ ఆఫ్ రికార్డ్స్ ప్రతినిధి రేఖా సింగ్ పతకాలను అందజేశారు. 

ఈ సందర్భంగా మాట్లాడిన జ్యోతి, తాను 2018నుంచి స్విమ్మింగ్​ చేస్తున్నట్లు, ఇప్పటికే పలు జాతీయ అంతర్జాతీయ పోటీల్లో పాల్గొన్నట్లు తెలిపింది. భవిష్యత్తులో తామిద్దరం కలిసి మరిన్ని పోటీల్లో పాల్గొనాలనుకుంటున్నట్లు చెప్పింది. అమ్మతో కలిసి ఈ ఫీట్​ సాధించడం సంతోషంగా ఉందన్న విహాన్​, ఆమే తనకు ప్రేరణ అని తెలిపాడు.