బీజేపీ గత పదేళ్లలో మతతత్వ రాజకీయం తప్ప చేసేందేమీ లేదు : మంత్రి ఉత్తమ్​ - Minister Uttam on BJP

Minister Uttam Allegations on BJP : బీజేపీ తెలంగాణ రాష్ట్రానికి చేసేందేమీ లేదని, గత పదేళ్లలో మతతత్వ రాజకీయం చేసి మతాల మధ్య చిచ్చుపెడుతోందని నీటి పారుదల శాఖ మంత్రి ఉత్తమ్​ కుమార్​ రెడ్డి ఆరోపించారు. ఇండియా కూటమిలో రాహుల్​ గాంధీ ప్రధానమంత్రి కాబోతున్నారని జోస్యం చెప్పారు. బీజేపీ ప్రతిపక్ష పార్టీల నేతలపై అక్రమంగా కేసులు పెట్టి జైల్లో పెడుతోందని మండిపడ్డారు. ఇవాళ సూర్యాపేట జిల్లాలోని హుజూర్​నగర్ నియోజకవర్గంలో మేళ్లచెరువు మండలాల ముఖ్య కార్యకర్తల సమావేశంలో ఆయన పాల్గొని మాట్లాడారు.

గత ప్రభుత్వం పోలీసులను అడ్డుపెట్టుకుని అక్రమంగా కేసులు పెట్టి పేదలను జైలు పాలు చేసిందని మంత్రి ఉత్తమ్ ​కుమార్​ రెడ్డి ధ్వజమెత్తారు. హుజూర్​నగర్​ను దేశంలోనే ఆదర్శ నియోజకవర్గంగా తీర్చిదిద్దుతానని స్పష్టం చేశారు. బీఆర్​ఎస్​కు 15 ఎంపీ స్థానాల్లో డిపాజిట్లు కూడా రావని ఎద్దేవా చేశారు. బీజేపీ రైతుల ఆదాయాన్ని రెట్టింపు చేస్తానని, అప్పుల పాలు చేసిందని విమర్శించారు. ఈ నెల 21న జరగబోయే హుజూర్​నగర్ నియోజకవర్గం సమావేశానికి భారీ సంఖ్యలో హాజరుకావాలని పార్టీ శ్రేణులకు పిలుపునిచ్చారు.