సుల్తాన్​ బజార్​లో వెరైటీ వినాయకుడు - రైల్వే గణేశ్​ను చూస్తే వావ్ అనాల్సిందే - RAILWAY MODEL GANEH IDOL IN HYD

Gokul Railway Ganesh in Hyderabad : హైదరాబాద్ నగరమంతా వినాయక నవరాత్రులతో ఆధ్యాత్మిక శోభ సంతరించుకుంది. నగర వ్యాప్తంగా భక్తులు స్వామివారిని వివిధ రూపాలలో కొలువుదీర్చారు. సుల్తాన్ బజార్ లో ఏర్పాటు చేసిన రైల్ నమూనా గణపతి చూపరులను అమితంగా ఆకట్టుకుంటుంది. హైదరాబాద్​లోని సుల్తాన్ బజార్ లో కోఠి గోకుల్ రైల్వేస్ నిర్వాహకులు ప్రతి ఏటా గణేశ్ విగ్రహాన్ని వినూత్నంగా ఏర్పాటు చేస్తారు.

గోకుల్  రైల్వే నమూనాతో విగ్రహ ఏర్పాటు: గోకుల్ రైల్వేస్ నమూనాతో కూడిన గణనానాథుడి విగ్రహాన్ని ప్రతిష్టించారు. ప్రవేశ ద్వారం వద్ద రైలు బొమ్మతో పాటు షెడ్యూళ్ల వివరాలతో కూడిన నమూనానును ఏర్పాటు చేశారు. లోపలికి వెళ్లగానే టిక్కెట్ కౌంటర్​లో ఓ వ్యక్తి దర్శనమిస్తారు. చిన్నసైజ్ రైల్, పీసీ, ఛాయ్, క్యాంటీన్​లో కూల్ డ్రింక్స్, చిప్స్ అమ్ముతూ ఇద్దరు వ్యక్తులు, ప్రయాణికుల బొమ్మలు మొదలైనవి ఉన్నాయి.  ఈ విధంగా రైలు ప్రయాణం చేస్తే ఎలా ఉంటుందో కళ్ళకు కట్టినట్లు నిర్వాహకులు సెట్టింగ్ ఏర్పాటు చేశారు. వినాయక విగ్రహాన్ని చూసేందుకు భక్తులు పెద్ద ఎత్తున తరలివస్తున్నారు.