కామారెడ్డిలోని పాస్‌పోర్టు కార్యాలయంలో అగ్నిప్రమాదం - కాలి బూడిదైన కంప్యూటర్లు, ఫైల్స్

Kamareddy Fire Accident Today : రాష్ట్రంలో వరుస అగ్నిప్రమాదాలు ఆందోళనకు గురి చేస్తున్నాయి. తాజాగా కామారెడ్డిలో అగ్నిప్రమాదం చోటుచేసుకుంది. నిజాంసాగర్ చౌరస్తాలోని ప్రధాన తపాలా కార్యాలయ ఆవరణలో ఉన్న పాస్‌పోర్టు, ఈ-సేవా కేంద్రంలో అకస్మాత్తుగా మంటలు చెలరేగాయి. దీంతో కార్యాలయంలో పెద్ద ఎత్తున మంటలు వ్యాపించాయి. ఈ క్రమంలోనే ఆ ప్రాంతమంతా పొగలు వ్యాపించాయి. గమనించిన స్థానికులు వెంటనే అగ్నిమాపక శాఖ అధికారులకు, పోలీసులకు సమాచారం అందించారు. హుటాహుటిన ఫైర్​ సిబ్బంది అక్కడికి చేరుకున్నారు. 

Fire Accident Kamareddy Passport office : ఘటనా స్థలానికి చేరుకున్న ఫైర్ సిబ్బంది అగ్ని మాపక శకటంతో మంటలను అదుపులోకి తెచ్చారు. ఈ ప్రమాదంలో కార్యాలయంలో ఉన్న ఫైల్స్, కంప్యూటర్లు అగ్నికి ఆహుతయ్యాయి. షార్ట్ సర్క్యూట్ కారణంగానే ప్రమాదం సంభవించి ఉంటుందని పోలీసులు అనుమానం వ్యక్తం చేస్తున్నారు. ఎవరైనా కావాలనే కార్యాలయానికి నిప్పంటించారా అనే కోణంలోనూ విచారణ చేస్తున్నారు. దీనిపై పోలీసులు కేసు నమోదు చేసుకొని దర్యాప్తు చేస్తున్నారు. ఈ ఘటనలో ఎటువంటి ప్రాణనష్టం జరగకపోవడంతో అంతా ఊపిరి పీల్చుకున్నారు.