షాపింగ్​ మాల్​లో చెలరేగిన మంటలు - అగ్నిమాపక సిబ్బందికి అస్వస్థత

Fire Accident In Kadapa District: వైఎస్సార్​ కడప జిల్లాలో అగ్నిప్రమాదం చోటు చేసుకుంది. ఓ షాపింగ్​ మాల్​లో జరిగిన ఈ ప్రమాదంలో ప్రాణ నష్టమేమి సంభవించకపోగా, మంటాలార్పుతున్న అగ్నిమాపక సిబ్బంది అస్వస్థతకు గురయ్యారు. ఇంతకీ ఏం జరిగిందంటే. వైఎస్సార్​ కడప జిల్లా ప్రొద్దుటూరులోని ఆకృతి షాపింగ్​ మాల్​లో సోమవారం ఉదయం మంటలు చెలరేగాయి. గమనించిన స్థానికులు అగ్నిమాపక సిబ్బందికి సమాచారం అందించారు. విషయం తెలుసుకున్న అగ్నిమాపక సిబ్బంది ఘటనాస్థలానికి చేరుకుని మంటలు ఆర్పేందుకు ప్రయత్నించారు. 

షాపింగ్​ మాల్​లోని రెండో అంతస్థులో మంటలు చెలరేగడంతో, ఆ ప్రాంతం దట్టమైన పొగతో నిండిపోయింది. రెండో అంతస్థులో పొగ నిండిపోవడంతో బయటకు వెళ్లే మార్గం లేకపోవడంతో షాపింగ్​మాల్​ అద్దాలను ధ్వంసం చేసి మంటలను ఆర్పేందుకు ప్రయత్నించారు. పొగ అధికంగా ఉండటంతో అగ్నిమాపక సిబ్బంది సాంబశివా రెడ్డి అస్వస్థకు గుర్యయారు. వెంటనే అతడ్ని ఆసుపత్రికి తరలించారు. షార్ట్​ సర్క్యూట్​ వల్ల ఈ ప్రమాదం సంభవించి ఉంటుందని అధికారులు అంచనా వేస్తున్నారు. ఘటనపై పూర్తి వివరాలు ఇంకా తెలియాల్సి ఉంది.