చిరు ఇంటి దగ్గర ఫ్యాన్స్ సెలబ్రేషన్స్​ - ప్రముఖుల సందడి

Chiranjeevi Padma Vibhushan Award Celebrations : మెగాస్టార్​ చిరంజీవికి దేశ రెండో అత్యున్నత పురస్కారం పద్మవిభూషణ్​ రావడంతో జూబ్లీహిల్స్​లోని ఆయన నివాసం వద్ద సందడి వాతావరణం నెలకొంది. అభిమానులు, కుటుంబసభ్యులు, సినీ, రాజకీయ ప్రముఖులు తెల్లవారుజాము నుంచే తరలివచ్చి చిరంజీవిని అభినందనలతో ముంచెత్తారు. సినిమాటోగ్రఫి మంత్రి కోమటిరెడ్డి వెంకట్​రెడ్డి, ఫిల్మ్​ ఛాంబర్​ అధ్యక్షుడు దిల్​రాజు, సినీగేయ రచయిత చంద్రబోస్​, దర్శకులు గుణశేఖర్​, మారుతి, బాబీ, బుచ్చిబాబు, వశిష్ట, సీనియర్​ నటులు మురళీమోహన్​, ఉత్తేజ్​ సహా పలువురు నిర్మాతలు చిరంజీవి నివాసానికి చేరుకొని పుష్పగుచ్ఛాలతో శుభాకాంక్షలు తెలిపారు. చిరంజీవి ప్రస్థానాన్ని గుర్తుచేసుకుంటూ మరిన్ని పురస్కారాలు అందుకోవాలని ఆకాంక్షించారు. మేనల్లుడు, నటుడు అల్లు అర్జున్​ కుటుంబసమేతంగా హాజరై చిరంజీవికి అభినందనలు తెలిపారు. వరుణ్​ తేజ్​ దంపతులు, సాయిధరమ్​ తేజ్​ సహా మరికొంత మంది కుటుంబసభ్యులు, సన్నిహితులు చిరు నివాసానికి చేరుకొని సందడి చేశారు. ఈ సందర్భంగా త్వరలోనే తెలంగాణ ప్రభుత్వం ఆధ్వర్యంలో చిరంజీవికి పౌర సన్మానం చేయనున్నట్లు మంత్రి కోమటిరెడ్డి వెంకట్​ రెడ్డి ప్రకటించారు. అలాగే చిత్ర పరిశ్రమ తరఫున కూడా ప్రత్యేక కార్యక్రమాన్ని ఏర్పాటు చేయనున్నట్లు దిల్​ రాజు వెల్లడించారు.