ఆర్టీసీ బస్సు డ్రైవర్​పై దాడికి పాల్పడిన బైకర్ - చివరకు ఏమైందంటే? - Biker Attack On RTC Driver

Biker Attack On RTC Driver : ఆర్టీసీ బస్సు డ్రైవర్​పై ఓ వ్యక్తి చెప్పుతో దాడికి పాల్పడిన ఘటన కలకలం రేపింది. ఈ సంఘటన కరీంనగర్ జిల్లా శంకరపట్నం మండలంలోని తాడికల్ గ్రామంలో చోటుచేసుకుంది. కరీంనగర్ నుంచి హనుమకొండ వైపు వెళ్తున్న బస్సు డ్రైవర్ అటువైపుగా ప్రయాణిస్తున్న ఓ లారీని ఓవర్​టేక్ చేసేందుకు ప్రయత్నించారు. అదే సమయంలో గాలిపల్లి అనిల్ అనే వ్యక్తి బస్సుకు ఎదురుమార్గంగుండా వస్తున్నారు. ఈ క్రమంలోనే బస్సు తనపైకే వస్తుందని భ్రమపడి, ఆగ్రహంతో ద్విచక్రవాహనాన్ని బస్సుకు ఎదురుగా నిలిపివేశాడు ఆ వ్యక్తి. 

బస్సులోనికి ప్రవేశించిన అనిల్ డ్రైవర్ విజయేందర్​పై విచక్షణారహితంగా చెప్పుతో దాడికి పాల్పడ్డాడు. ఈ ఊహించని పరిణామానికి బస్సులోని ప్రయాణికులు ఒక్కసారిగా భయబ్రాంతులకు గురయ్యారు. కాగా దాడి చేసిన వ్యక్తి మద్యం మత్తులో ఉన్నట్లుగా వారు తెలిపారు. ఈ ఘటనలో డ్రైవర్​కు స్వల్ప గాయాలయ్యాయి. చివరకు సదరు వ్యక్తితో కలిసి అంతా పోలీసుస్టేషన్ వెళ్లారు. తనపై దాడికి పాల్పడిన వ్యక్తిపై డ్రైవర్ పోలీసులకు ఫిర్యాదు చేశారు. డ్రైవర్ ఇచ్చిన ఫిర్యాదు మేరకు కేసు నమోదు చేసి దర్యాప్తు చేపట్టామని ఎస్ఐ పాకాల లక్ష్మారెడ్డి తెలిపారు.