ఎనిమిదేళ్ల ప్రేమ - ప్రేయసి మోసం చేసిందని ప్రేమికుడు ఆత్మహత్య - Young Man Suicide failed love in ap

A Young Man Commits Suicide : ఓ అమ్మాయిని ప్రేమించి మోసపోయానని జీవితంపై విరక్తి చెంది ఓ యువకుడు సెల్ఫీ వీడియో తీసుకుని ఆత్మహత్యకు పాల్పడ్డాడు. ఈ విషాదకరమైన ఘటన ఏపీలోని కర్నూల్​లో జరిగింది. స్థానికులు తెలిపిన వివరాల ప్రకారం, తెలంగాణలోని గద్వాల జిల్లా వడ్డేపల్లి మండలం జులకల్​ గ్రామానికి చెందిన అశోక్ అనే యువకుడు కర్నూల్​ సిటీలోని కొత్త బస్టాండ్​ సమీపంలో ఉన్న లాడ్జ్​లో గదిని అద్దెకు తీసుకున్నాడు.

​ప్రేమలో మోసపోయానని, ఎవరూ ప్రేమించవద్దంటూ సెల్ఫీ వీడియో తీసుకొని ఆత్మహత్య చేసుకున్నాడు. ఒక అమ్మాయిని ఎనిమిదేళ్లుగా ప్రేమించానని, చివరికి ఇలా మోసపోయానని వాపోయాడు. ప్రేమికురాలి నాన్న కానిస్టేబుల్​గా విధులు నిర్వర్తిస్తున్నారని తెలిపాడు. తన పరిచయాలతో సీఐ స్థాయి వ్యక్తుల నుంచి బెదిరింపులకు పాల్పడుతున్నాడని ఆవేదన వ్యక్తం చేశాడు. చివరికి బరువెక్కిన గుండెతో అక్కడే ఉన్న ఫ్యాన్​కు ఉరివేసుకొని ఆత్మహత్య చేసుకున్నాడు. యువకుడు ఆత్మహత్యను గమనించిన లాడ్జ్​ సిబ్బంది వెంటనే నాలుగో పట్టణ పోలీసులకు సమాచారం ఇచ్చారు. మృతదేహాన్ని పరిశీలించిన పోలీసులు కేసు నమోదు చేసుకుని దర్యాప్తు ప్రారంభించారు. అనంతరం మృతదేహాన్ని శవపరీక్ష నిమిత్తం మార్చురీకి తరలించారు.