Stolen Device Protection Iphone : ఐఫోన్ భద్రతకు పెట్టింది పేరు. ఇందులోని సెక్యూరిటీ ఫీచర్స్ కారణంగానే ఐఫోన్ను చాలా మంది ఉపయోగిస్తారు. కొంచెం రేటు ఎక్కువైనా సాధ్యమైతే ఐఫోన్ను కొనుగోలు చేయడానికి ఇష్టపడతారు. ఇందులోని ఎకో ఫ్రెండ్లీ నేచర్, చాలా మంది దీన్నొక స్టేటస్ సింబల్ లాగా చూడటం కూడా కారణాలుగా చెప్పవచ్చు.
అయితే తాజాగా ఐఫోన్ వినియోగదారులకు ఆ సంస్థ గుడ్న్యూస్ చెప్పింది. iOS 17.3 సాఫ్ట్వేర్ అప్డేట్ను తీసుకొచ్చింది. ఇందులోని ఓ ఫీచర్ మీ భద్రతను మరింత పెంచుతుంది. ఆ ఫీచర్ పేరే 'స్టోలెన్ డివైస్ ప్రొటెక్షన్'. ఇది మీ వ్యక్తిగత వివరాలు మరొకరి చేతుల్లోకి వెళ్లకుండా కాపాడుతుంది. ఫోన్ దొంగతనానికి గురైనప్పుడు, వేరొకరు ఉపయోగించిన సందర్భంలో మీకు ఉపయోగపడుతుంది.
యాక్సెస్ చేయడం అంత ఈజీ కాదు
'స్టోలెన్ డివైస్ ప్రొటెక్షన్' ఫీచర్, ఫేస్ ఐడీ లేదా టచ్ ఐడీని మించి డేటా లాక్ చేస్తుంది. ఒకవేళ మీ ఫోన్ చోరీకి గురైతే ఎవరికైనా మీ పాస్వర్డ్ తెలిసినా ఈ ఫీచర్ను ఆన్ చేయడం వల్ల మీ డేటాను యాక్సెస్ చేయలేరు. ముఖ్యంగా ఐక్లౌడ్ కీచైన్లోని పాస్వర్డ్ యాక్సెస్ చేయలేరు. మొత్తంగా చెప్పాలంటే ఇది మీ ఫోన్లోని గోప్యమైన సమాచారానికి రక్షణ కవచంలా పనిచేస్తుంది.
ఇందులోని మరో ఫీచర్ ఏంటంటే మీరు యాపిల్ ఐడీ వంటి సెక్యూరిటీ సమాచారాన్ని మార్చాలనుకున్నప్పుడు దాదాపు గంట సేపు వేచి ఉండాల్సి వస్తుంది. తర్వాతే ఫేస్ ఐడీ, టచ్ ఐడీ పనిచేస్తుంది. దీని వల్ల మన ఫోన్ పోయినప్పుడు ఇతరులు డేటా యాక్సెస్ చేయడం లేదా పాస్వర్డ్ మార్చటం లాంటివి సులభంగా చేయలేరు.
ఫ్యామిలీతో ప్లేలిస్ట్ షేర్ చేసుకోవచ్చు
ఈ అప్డేట్లో యాపిల్ మ్యూజిక్ ఫీచర్ కూడా మార్చింది. తాజా అప్డేట్తో మీ ఫ్రెండ్స్ అండ్ ఫ్యామిలీ మెంబర్స్తో కలిసి ప్లే లిస్టును షేర్ చేసుకోవచ్చు. కమ్యూనల్ ప్లే లిస్టులో మీకిష్టమైన పాటను అందరూ వినేలా యాడ్ చేయవచ్చు. వాల్ పేపర్లో కూడా కొత్త అప్డేట్ తీసుకొచ్చారు. యూనిటీ వాల్ పేపర్ అనే ఫీచర్ తెచ్చారు. దీన్ని యాపిల్ వాచ్తో కనెక్ట్ చేయవచ్చు.
యాపిల్ ఐఓఎస్ 17.3 అప్డేట్ ఐప్యాడ్ ఓఎస్ 17.3, వాచ్ ఓఎస్ 10.3, మ్యాక్ ఓఎస్ సొనోమా 14.3 ఆపరేటింగ్ సిస్టమ్లలో అందుబాటులో ఉంది. ఒకవేళ మీరు పాత ఐఓఎస్ ఉపయోగిస్తున్నట్లైతే వెంటనే అప్డేట్ చేసుకోండి. దీనికోసం సెట్టింగ్స్లోకి వెళ్లి, జనరల్ అండ్ సాఫ్ట్వేర్ అప్డేట్ను ఎంచుకుని అప్డేట్పై క్లిక్ చేయండి. ఒకవేళ మీకు కొత్త అప్డేట్ అందుబాటులో ఉంటే డౌన్లోడ్ చేసుకుని ఇన్స్టాల్ చేసుకోండి.
మీ ఫోన్లో స్టోలెన్ డివైజ్ ప్రొటెక్షన్ ఫీచర్ ఆన్ చేసుకోవాలంటే సెట్టింగ్స్ ఓపెన్ చేసి Face ID & Passcode Authenticate ఎంచుకుని పాస్వర్డ్ ఎంటర్ చేసి కిందకి స్క్రోల్ చేస్తే అక్కడ Stolen Device Protection ఆప్షన్ కనిపిస్తుంది. దాన్ని Enable చేసుకోండి.
BSNL సరికొత్త రీఛార్జ్ ప్లాన్స్- డేటా అధికంగా వాడేవారికి పండగే!
వన్ప్లస్ 12 సిరీస్ లాంఛ్ - ఫీచర్స్, స్పెక్స్ అదుర్స్ - ధర ఎంతంటే?
