మిడిల్​ క్లాస్​ కోసం జియో కొత్త యాప్- ఇకపై ఇంట్లో టీవీలు చిటికెలో కంప్యూటర్లుగా..!

జియో మరో సంచలనం- కంప్యూటర్లుగా మారనున్న టీవీలు..!

Jio New Cloud PC App: జియో ఫైబర్‌ ద్వారా ఇంటర్నెట్‌తో పాటు డిజిటల్‌ ఛానెల్స్​ను అందిస్తున్న రిలయన్స్‌ జియో సంచలనానికే మారుపేరు. ప్రపంచంలోనే అత్యంత సంపన్నుల్లో ఒకరైన ముకేశ్ అంబానీ కొంతకాలం కిందట దీన్ని తీసుకుని వచ్చారు. టెలికాం రంగంలోకి అడుగుపెడుతూనే ఇది విప్లవం తీసుకొచ్చింది. అన్​లిమిటెడ్ డేటాను తక్కువ ధరకే పరిచయం చేసింది. ఆ తర్వాత కూడా మరెన్నో ఆశ్చర్యకర ప్రకటనలు చేసింది. తాజాగా ఈ టెలికాం దిగ్గజ సంస్థ రిలయన్స్ జియో మరో కొత్త సంచలనానికి సిద్ధమైంది.

ఒక్క యాప్‌తో స్మార్ట్‌ టీవీ కంప్యూటర్‌లా: మధ్యతరగతి కుటుంబాలకు మేలు చేసే నేపథ్యంలో రిలయన్స్ జియో ఓ కొత్త యాప్​ను రూపొందించింది. ఒక్క యాప్‌ సాయంతో స్మార్ట్‌ టీవీని కంప్యూటర్‌లా మార్చుకునే సౌకర్యాన్ని తీసుకొచ్చేందుకు సిద్ధమైంది. ఈ టెక్నాలజీని ఇండియన్‌ మొబైల్‌ కాంగ్రెస్‌- 2024 ఈవెంట్‌లో ప్రదర్శించింది.

జియో క్లౌడ్‌ పీసీగా పిలిచే ఈ టెక్నాలజీతో కొన్ని వందల రూపాయలతోనే మీ స్మార్ట్‌ టీవీని కంప్యూటర్‌గా మార్చుకోవచ్చని కంపెనీ తెలిపింది. ఇంటర్నెట్‌ సౌకర్యం, మౌస్‌, కీబోర్డు, స్మార్ట్‌టీవీ ఉంటే చాలు.. ఈ కొత్త జియో క్లౌడ్‌ పీసీ యాప్​ను ఉపయోగించి టీవీని కంప్యూటర్‌లా మార్చుకోవచ్చని జియో పేర్కొంది. యాప్‌లో లాగిన్‌ అయ్యి కంప్యూటర్‌ తరహాలోనే ఈ-మెయిల్స్‌, మెసేజింగ్‌, సోషల్‌ మీడియా, ఇంటర్నెట్‌ బ్రౌజింగ్‌ వంటివి చేసుకోవచ్చు. ఈ డేటా మొత్తం క్లౌడ్‌లో స్టోర్‌ అవుతుంది.

మిడిల్​క్లాస్​ ఫ్యామిలీ కోసం ఆలోచన: మిడిల్​క్లాస్​ ఫ్యామిలీకి కంప్యూటర్‌ కొనుగోలు భారం కాకూడదన్న ఉద్దేశంతో ఈ కొత్త సాంకేతికను తీసుకొచ్చినట్లు జియో తెలిపింది. ఈ కొత్త జియో క్లౌడ్‌ పీసీతో స్మార్ట్‌ టీవీ, కంప్యూటర్‌ రెండు వేర్వేరు డివైజెస్ కొనుగోలు చేయాల్సిన అవసరం ఇక ఉండదని టీమ్‌ పేర్కొంది.

మొబైల్‌లో సైతం జియో క్లౌడ్‌ పీసీ: సాధారణ టీవీలను జియో ఫైబర్‌/ జియో ఎయిర్‌ఫైబర్‌ సెట్ టాప్‌ బాక్స్‌ అమర్చడం ద్వారా స్మార్ట్‌గా మార్చుకోవచ్చని కంపెనీ పేర్కొంది. మొబైల్‌లో సైతం ఈ కొత్త సర్వీస్​ను వాడుకోవచ్చని తెలిపింది. అయితే ఈ యాప్‌ను ఎప్పుడు రిలీజ్ చేస్తుంది? దీని ధర ఎంత ఉంటుందనే వివరాలను మాత్రం వెల్లడించలేదు.