Reliance Introduces Jio TV OS: జియో ఫైబర్‌ ద్వారా ఇంటర్నెట్‌తో పాటు డిజిటల్‌ ఛానెళ్లను అందిస్తున్న రిలయన్స్ జియో సంచలనానికే మారుపేరు. ముకేశ్ అంబానీ కొంతకాలం కిందట దీన్ని తీసుకుని వచ్చారు. టెలికాం రంగంలోకి అడుగుపెడుతూనే ఇది విప్లవం తీసుకొచ్చింది. అన్లిమిటెడ్ డేటాను తక్కువ ధరకే పరిచయం చేసింది. ఆ తర్వాత కూడా మరెన్నో ఆశ్చర్యకర ప్రకటనలు చేసింది. తాజాగా సెటాప్‌ బాక్స్‌ కోసం జియో టీవీ ఓఎస్‌ను ప్రకటించింది. దీంతో పాటు జియో కాల్ ఏఐ సర్వీసులనూ పరిచయం చేసింది.
రిలయన్స్ ఏజీఎమ్: ఇవాళ మధ్యాహ్నం 2 గంటల సమయంలో రిలయన్స్ ఇండస్ట్రీస్ 47వ వార్షిక సాధారణ సమావేశం(Reliance AGM) నిర్వహించింది. ఈ సమావేశంలో భాగంగా జియో టీవీ ఓఎస్‌తో పాటు జియో కాల్ ఏఐనీ ప్రకటించారు. ఈ క్రమంలో ఈ కొత్త జియో టీవీ ఓఎస్ ద్వారా తమ డిజిటల్‌ ఛానెల్‌ సేవలు మరింత మెరుగు కానున్నాయని ఆకాశ్ అంబానీ తెలిపారు. దీంతోపాటు జియో టీవీ ఓఎస్ ద్వారా 4కె యూహెచ్‌డీ, డాల్బీ విజన్‌, డాల్బీ అట్మాస్ సాధ్యమవుతుందని పేర్కొన్నారు.
'హెలో జియో': ఈ కొత్త జియో టీవీ ఓఎస్‌లో భాగంగా సెటాప్‌ బాక్స్‌ రిమోట్‌లోనే కొత్తగా ఏఐ బటన్ ఇస్తున్నారు. "హెలో జియో" పేరిట దీన్ని తీసుకొచ్చారు. దీని సహాయంతో వాయిస్‌ కమాండ్స్‌ ద్వారా సెటాప్‌ బాక్స్‌ను కంట్రోల్‌ చేయొచ్చు. ఇందుకోసం రిమోట్‌లోనే ఓ మైక్ బటన్ను కూడా ఇచ్చారు. వాల్యూమ్‌ పెంచడం, తగ్గించడం వంటివి ఈ మైక్ బటన్ ద్వారా చేయొచ్చు. అంతేకాదు అమెజాన్‌ ప్రైమ్‌, డిస్నీ+ హాట్‌స్టార్‌ వంటి యాప్స్‌ను కూడా యాక్సెస్‌ చేయొచ్చని ఆకాశ్ అంబానీ పేర్కొన్నారు.
జియో కాల్ ఏఐ సర్వీసులు: ఈ సందర్భంగా జియో ఫోన్‌కాల్ ఏఐ సర్వీసులనూ ప్రారంభిస్తున్నట్లు ఆకాశ్ అంబానీ ప్రకటించారు. ఇందుకోసం ప్రత్యేకంగా ఓ నంబర్‌ కేటాయించారు. ఈ కాల్‌లో కాల్స్‌ను రికార్డు చేసుకోవచ్చు. ఆ కాల్ రికార్డులు జియో క్లౌడ్‌లో ఆటోమేటిక్‌గా స్టోర్‌ అవుతాయని ఆకాశ్ తెలిపారు. కాల్ రికార్డును కావాలంటే వేరే భాషలో ట్రాన్స్‌స్క్రైబ్‌ చేసుకోవచ్చని అన్నారు. జియో క్లౌడ్‌ నుంచి ఎప్పుడైనా వీటిని వినియోగించుకోవచ్చని ఆకాశ్ అంబానీ పేర్కొన్నారు.
శాంసంగ్ ఫోన్లపై అదిరే ఆఫర్స్- రూ.6వేల వరకు భారీ తగ్గింపు! - huge discounts on samsung phones
