Humanoid Robot Race : ప్రస్తుత టెక్ ప్రపంచంలో 'ఆర్టిఫీషియల్ ఇంటెలిజెన్స్' (AI) హవా నడుస్తోంది. ప్రముఖ టెక్ సంస్థలు అన్నీ తమదైన ఏఐ టూల్స్ నిర్మించుకునే పనిలో ఉన్నాయి. ఓపెన్ ఏఐకు చెందిన 'చాట్జీపీటీ', గూగుల్కు చెందిన 'జెమినీ'లకు పోటీగా యాపిల్ కంపెనీ 'ఆస్క్' అనే ఏఐ టూల్ను అభివృద్ధి పరుస్తోంది. ఇక భారతీయ వ్యాపార దిగ్గజం ముకేశ్ అంబానీ ఫండింగ్ చేసి 'హనుమాన్' అనే ఏఐ టూల్ను డెవలప్ చేయిస్తున్నారు. త్వరలోనే దీనిని లాంఛ్ కూడా చేయనున్నారు. ఇంకా ప్రచారంలోకి రాని పలు కంపెనీలు కూడా ఏఐ టూల్స్ రూపకల్పన కోసం తీవ్రంగా ప్రయత్నిస్తున్నాయి.
హ్యూమనాయిడ్ రోబో రేస్
ఒకవైపు ఏఐ టూల్స్ రూపకల్పనలో పోటీపడుతున్న టెక్ దిగ్గజాలు, మరోవైపు హ్యూమనాయిడ్ రోబోల తయారీపైనా దృష్టి కేంద్రీకరిస్తున్నాయి. అమెరికాకు చెందిన అపర కుబేరుడు ఎలాన్ మస్క్ ఇప్పటికే 'ఆప్టిమస్' అనే హ్యూమనాయిడ్ రోబోను తయారు చేయించారు. దీనికి సంబంధించిన ఓ వీడియోను ఎక్స్ (ట్విట్టర్)లో షేర్ చేశారు. దీనిని దాదాపు 66 మిలియన్ల మంది వీక్షించారు. ఈ ఆస్టిమస్ అనే రోబో ఎవరి సాయం లేకుండా, తనకు నచ్చినట్లుగా సొంతంగా నడుస్తోంది. అంటే తనకు తానే స్వయంగా నిర్ణయాలు తీసుకోగలుగుతోంది. దీనిని చూసి నెటిజన్లు ఫిదా అవుతున్నారు.
సొంతంగా ఆలోచిస్తోంది!
'ప్రస్తుతానికి ఈ రోబో పూర్తి స్వయంప్రతిపత్తితో పనిచేయడం లేదు. కానీ భవిష్యత్లో ఇది స్వతంత్రంగా ఆలోచిస్తూ, తన పనులు తనే చేసుకోగలుగుతుంది' అని ఎలాన్ మస్క్ ట్వీట్ చేయడం విశేషం.
అమెజాన్ రోబో : అమెజాన్ వ్యవస్థాపకుడు జెఫ్ బెజోస్, టెక్నాలజీ కంపెనీ ఎన్వీడియాతో కలిసి కృత్రిమ మేధ కలిగిన హ్యూమనాయిడ్ రోబోను తయారు చేయించడానికి సిద్ధమవుతున్నారు. ఇందుకోసం 'ఫిగర్ ఏఐ' అనే టెక్ స్టార్టప్కు నిధులు అందిస్తున్నారు. ఈ విషయాన్ని బ్లూమ్ బెర్గ్ న్యూస్ తెలిపింది.
'హ్యూమనాయిడ్ రోబో తయారీకి ఏకంగా 2 బిలియన్ డాలర్లు సమీకరించాలని ఫిగర్ ఏఐ సంస్థ నిర్ణయించింది. ఇందుకోసం ఇప్పటికే 675 మిలియన్ డాలర్లు సమీకరించింది. ఈ ఫీగర్ ఏఐ టెక్ స్టార్టప్కు జెఫ్ బెజోస్ తన సంస్థ అయిన ఎక్స్ప్లోర్ ఇన్వెస్ట్మెంటస్ ఎల్ఎల్సీ ద్వారా 100 మిలియన్ డాలర్లు; మైక్రోసాఫ్ట్ సంస్థ 95 మిలియన్ డాలర్లు అందించడం జరిగింది. ఎన్వీడియా, అమెజాన్ అఫిలియేటెడ్ ఫండ్లు కలిసి మరో 50 మిలియన్ డాలర్లు సమకూరుస్తున్నారు' అని బ్లూమ్బర్గ్ నివేదిక పేర్కొంది.
నో కామెంట్స్
హ్యూమనాయిడ్ రోబోలు తయారు చేయడానికి పెట్టుబడులు పెడుతున్నట్లు వస్తున్న వార్తలపై వ్యాఖ్యానించడానికి అమెజాన్, మైక్రోసాఫ్ట్, ఎన్వీడియా కంపెనీలు నిరాకరించాయి.
పెనుముప్పు తప్పందా?
చాలా మంది టెక్ నిపుణులు ఆర్టిఫీషియల్ ఇంటెలిజెన్స్తో మానవాళికి పెనుముప్పు ఉందని హెచ్చరిస్తున్నారు. కానీ టెక్ కంపెనీలు ఏఐ టూల్స్ తయారు చేయడానికి పరస్పరం పోటీపడుతున్నాయి. వీటికి తోడు ఏఐతో పనిచేసే హ్యూమనాయిడ్ రోబోస్ను కూడా తయారు చేస్తున్నాయి. ఒక వేళ రోబోలు స్వయంగా ఆలోచించడం మొదలైతే, అప్పుడు మనుషుల పరిస్థితి ఏమౌతుందో!
కంటెంట్ క్రియేటర్ల కోసం 7 బెస్ట్ ఏఐ టూల్స్ - ట్రై చేయండి!
చాట్జీపీటీకి పోటీగా యాపిల్ 'Ask' ఏఐ టూల్ - లాంఛ్ ఎప్పుడంటే?
