Google Android New Features AI : సాధారణంగా మొబైల్ను చేతితో ఆపరేట్ చేస్తుంటాం. గేమ్స్, చాటింగ్, కాల్స్ ఇలా ఏవి చేయాలన్నా చేతితోనే చేస్తాం. అయితే ఇక నుంచి ఆ అవసరం లేదు. ముఖ కవళికల ద్వారా ఫోన్ను ఆపరేట్ చేయొచ్చు. అలాగే గేమ్స్ సైతం ఆడుకోవచ్చు. మరికొద్ది రోజుల్లో ఆండ్రాయిడ్ యూజర్లకు గూగుల్ ఈ ఆర్టిఫీషియల్ ఇంటిలిజెన్స్(ఏఐ) టెక్నాలజీని అందుబాటులోకి తీసుకురానుంది. ఈ టెక్నాలజీ వస్తే మొబైల్ వాడేటప్పుడు చేతినే ఉపయోగించక్కర్లేదు. మరెందుకు ఆలస్యం ఈ గూగుల్ ఏఐ టెక్నాలజీ గురించి తెలుసుకుందాం.
ప్రాజెక్ట్ గేమ్ ఫేస్ అనే ఫీచర్ను మరికొద్ది రోజుల్లో ఆండ్రాయిడ్ యూజర్లకు అందుబాటులోకి తీసుకురానున్నట్లు గూగుల్ ఓ ప్రకటనలో తెలిపింది. ఈ ఫీచర్ ముఖ కవళికలు, తల, పెదాలు, కళ్లు వంటి వాటితో సంజ్ఞలు చేస్తే పనిచేస్తుంది. 'ఫోన్ కెమెరా ద్వారా ఈ ఏఐ టెక్నాలజీ ముఖ, తల కదలికలను ట్రాక్ చేస్తుంది. ఆ తర్వాత ఆ కవళికలను అనువదిస్తుంది. ప్లేఎబిలిటీ వంటి కంపెనీలు తమ సమగ్ర సాఫ్ట్‌వేర్లో ప్రాజెక్ట్ గేమ్ ఫేస్ను ఉపయోగించడాన్ని చూసి సంతోషిస్తున్నాం. త్వరలో ఆండ్రాయిడ్ వెర్షన్లో గేమ్ ఫేస్ ఫీచర్ను అందుబాటులోకి తెస్తున్నాం' అని ఓ ప్రకటనలో గూగుల్ పేర్కొంది.
గేమ్ ఫేస్ ఫీచర్ను ఉద్యోగ రంగం, ఇతర మొబైల్ ఆపరేషన్స్లోనూ పరీక్షించడానికి గూగుల్ ఇన్ క్లూజ్జా అనే సంస్థతో భాగస్వామ్యం కుదర్చుకుంది. కాగా, ప్రాజెక్ట్ గేమ్ ఫేస్ మొదటిసారిగా 2023లో ఓపెన్ సోర్స్, హ్యాండ్స్-ఫ్రీ గేమింగ్ మౌస్‌ గా ప్రారంభమైంది. కంప్యూటర్లో తల, ముఖ కవళికలతో ఆపరేట్ అయ్యింది. త్వరలో ఆండ్రాయిడ్ వెర్షన్లోనూ అందుబాటులోకి రానుంది.
డాక్టర్ ప్రిస్క్రిప్షన్ సులువుగా చదివేయొచ్చు!
కొన్నాళ్ల క్రితం డాక్టర్ ప్రిస్క్రిప్షన్ సులువుగా అర్థం చేసుకునేందుకు వీలుగా గూగుల్ ఫీచర్ను తీసుకొచ్చింది. డాక్టర్ రాసిచ్చిన ప్రిస్క్రిప్షన్‌ను యూజర్‌ గూగుల్ లెన్స్‌తో ఫొటో తీస్తే, అందులోని మందుల వివరాలను సెర్చ్‌లో చూపిస్తుంది. అయితే, సెర్చ్‌ రిజల్ట్‌లో చూపించిన మందుల వివరాలను ఆధారంగా యూజర్లు ఇప్పుడే ఒక నిర్ధరణకు రావొద్దని గూగుల్ సూచిస్తుంది. ఈ ఫీచర్ను మరింత మెరుగుపరిచేందుకు మెడికల్‌ రికార్డ్‌లను డిజిటలైజ్‌ చేయడం సహా ఫార్మసిస్ట్‌లతో కలిసి పనిచేస్తున్నట్లు వెల్లడించింది. ఇది ఏఐ ఆధారిత మెషీన్‌ లెర్నింగ్ సాంకేతికత సాయంతో పనిచేస్తుంది.
