Google Maps Latest Features For IPhone Users : మనలో చాలా మంది ఏదో ఒక సందర్భంలో స్పీడ్ లిమిట్ దాటి ట్రాఫిక్ చలాన్ కట్టే ఉంటారు. వాస్తవానికి ఇది ఆర్థికంగా చాలా ఇబ్బంది కలిగించే అంశం. అందుకే గూగుల్ మ్యాప్స్ రహదారి భద్రతను పెంపొందించడం కోసం, అలాగే డ్రైవర్లకు అసిస్టెన్స్ అందించడం కోసం స్పీడోమీటర్, స్పీడ్ లిమిట్స్ అనే రెండు ఫీచర్లను అందుబాటులోకి తెచ్చింది. వాస్తవానికి ఆండ్రాయిడ్ ఫోన్ యూజర్లకు 2019 మే నెల నుంచే ఈ రెండు ఫీచర్లు అందుబాటులోకి వచ్చాయి. అయితే తాజాగా ఈ 2 ఫీచర్లను ఐఫోన్ యూజర్లకు కూడా అందుబాటులోకి తెచ్చినట్లు గూగుల్ తెలిపింది.
ఈ ఫీచర్లు ఎలా పని చేస్తాయి?
వాహనాన్ని నడిపేవారు తాము ఎంత వేగంతో ప్రయాణిస్తున్నామో తెలుసుకోవడానికి గూగుల్ మ్యాప్స్లోని స్పీడోమీటర్ ఫీచర్ ఉపయోగపడుతుంది. అయితే దీనిని కేవలం సమాచారం కోసమే వాడాలని, కొన్ని సందర్భాల్లో వాహనం వాస్తవ వేగానికి, స్పీడోమీటర్ చూపించే రీడింగ్కు మధ్య వ్యత్యాసం ఉండే అవకాశం ఉందని గూగుల్ స్పష్టం చేసింది. కనుక నిజమైన వేగాన్ని నిర్ధరణ చేసుకోవడానికి, వాహనంలోని స్పీడోమీటర్నే ఉపయోగించాలని సూచించింది.
స్పీడ్ లిమిట్ ఫీచర్ అనేది మీరు పరిమితికి మించి, వేగంగా బండిని నడుపుతూ ఉంటే, మిమ్మల్ని హెచ్చరిస్తుంది. ముఖ్యంగా నిర్దిష్ట వేగ పరిమితిని దాటితే, ఇది స్పీడ్ ఇండికేటర్ రంగులను మారుస్తుంది.
ఈ విధంగా స్పీడోమీటర్, స్పీడ్ లిమిట్స్ ఫీచర్లు డ్రైవర్లకు రియల్-టైమ్లో స్పీడ్లిమిట్ సమాచారాన్ని అందిస్తాయి. కనుక నిర్దిష్ట వేగానికి మించి వాహనం నడపకుండా డ్రైవర్లు జాగ్రత్త పడడానికి వీలవుతుంది.
ట్రాఫిక్ రూల్స్ మారుతూ ఉంటాయ్!
దేశంలోని వివిధ ప్రాంతాలను బట్టి ట్రాఫిక్ రూల్స్ మారుతుంటాయి. ఎలా అంటే? హైవేస్లో కాస్త వేగంగా వాహనం నడపవచ్చు. కానీ లోకల్ రోడ్లపై వేగం తగ్గించుకుని వెళ్లాల్సి ఉంటుంది. కానీ కొన్ని సార్లు హైవే నుంచి లోకల్ రోడ్లపైకి వచ్చినప్పుడు స్పీడ్ లిమిట్ విషయాన్ని డ్రైవర్లు గమనించలేకపోవచ్చు. ఇలాంటి సమయాల్లో అనవసరంగా చలాన్ కట్టాల్సి వస్తుంది. దీన్ని నివారించేందుకు గూగుల్ మ్యాప్స్లోని స్పీడోమీటర్ ఫీచర్ను ఎనేబుల్ చేసుకోవడం మంచిది.
ప్రాంతీయ నిబంధనలతోనూ సమస్య!
నిర్మాణాలు జరిగే ప్రాంతాల్లో తాత్కాలికంగా స్పీడ్ లిమిట్స్ విధిస్తూ ఉంటారు. ముఖ్యంగా సదరు ప్రాంతంలో పనిచేసే కార్మికులకు, అలాగే డ్రైవర్లకు భద్రత కల్పించడం కోసం ఇలాంటి టెంపరరీ స్పీడ్ లిమిట్స్ను అమలు చేస్తూ ఉంటారు. అయితే రాత్రి సమయాల్లో, వాతావరణం బాగాలేని సందర్భాల్లో డ్రైవర్లు ఇలాంటి విషయాలను గమనించలేకపోవచ్చు. అందుకే గూగుల్ మ్యాప్స్ స్పీడోమీటర్ ఫీచర్ను అందుబాటులోకి తెచ్చింది. ఈ స్పీడో మీటర్ డ్రైవర్లకు నావిగేషన్ అసిస్టెన్స్ను అందిస్తుంది. అంటే రియల్టైమ్లో సదరు ప్రాంతంలో ఎంత వేగంతో వాహనం నడపాలో డ్రైవర్లకు తెలియజేస్తుంది. ఇది వరకు ఈ ఫీచర్ కేవలం ఆండ్రాయిడ్ ఫోన్ యూజర్లకు మాత్రమే అందుబాటులో ఉండేది. కానీ దీనిని ఇప్పుడు ఐఫోన్ యూజర్లు కూడా ఉపయోగించుకోవచ్చు.
స్పీడోమీటర్ ఫీచర్ వాడడం ఎలా?
How To Enable Speedometer In Google Maps :
- ముందుగా మీ ఐఫోన్ లేదా ఆండ్రాయిడ్ ఫోన్లోని గూగుల్ మ్యాప్స్ యాప్ను ఓపెన్ చేయండి.
- మీ ప్రొఫైల్ పిక్చర్ లేదా ఇనీషియల్ అకౌంట్ సర్కిల్పై క్లిక్ చేయండి.
- డ్రాప్డౌన్ మెనూలో మీకు Settings ఆప్షన్ కనిపిస్తుంది. దానిపై క్లిక్ చేయండి.
- అక్కడ మీకు Navigation Settings ఆప్షన్ కనిపిస్తుంది. దానిపై క్లిక్ చేయండి.
- వెంటనే మీకు Driving Options కనిపిస్తుంది. దానిపై క్లిక్ చేస్తే, మీకు వివిధ డ్రైవింగ్ ఫీచర్లు కనిపిస్తాయి.
- ఈ డ్రైవింగ్ ఆప్షన్లలోనే Speedometer, Speed Limits ఫీచర్లు కనిపిస్తాయి. వాటిని మీరు Turn on చేసుకోవాలి. అంతే సింపుల్!
ఇకపై మీరు గూగుల్ మ్యాప్స్ ఓపెన్ చేసిన ప్రతిసారీ, మీ GPS స్పీడ్ ఎంత ఉందో తెలుస్తుంది. అంతేకాదు మీరు స్పీడ్ లిమిట్ దాటి వాహనాన్ని నడుపుతూ ఉంటే, మీకు అలర్ట్ కూడా వస్తుంది. దీనితో మీరు పరిమిత వేగంతో వాహనాన్ని నడపడానికి వీలవుతుంది.
ఇంతకీ స్పీడోమీటర్ ఎలా పనిచేస్తుంది?
How Speedometer Works : గూగుల్ మ్యాప్స్లోని స్పీడోమీటర్ ఫీచర్ పూర్తిగా ఆర్టిఫీషియల్ ఇంటెలిజెన్స్ (AI) సాయంతో పనిచేస్తుంది. కనుక ఇది స్ట్రీట్ వ్యూ ఇమేజరీ (రహదారి చిత్రాలు) సహా, థర్డ్-పార్టీ చిత్రాలను పరిశీలించి, జీపీఎస్ సమాచారాన్ని విశ్లేషించి, సదరు ప్రాంతంలో వాహన వేగం (స్పీడ్ లిమిట్) ఎంత ఉండాలనేది డ్రైవర్లకు తెలియజేస్తుంది. అంతేకాదు వాహనం వెళ్లాల్సిన ప్రాంతంలో ట్రాఫిక్ ఎలా ఉంది? అక్కడ ఎంత వేగంతో ప్రయాణించాలి? అనే విషయాలను కూడా తెలియజేస్తుంది.
వర్షాకాలంలో ఉపయోగపడే టాప్-10 కార్ & బైక్ డ్రైవింగ్ టిప్స్ ఇవే! - Monsoon Driving Tips
బాగా ధనవంతులు కావాలని ఆశపడుతున్నారా? ఈ 'సక్సెస్ ఫార్ములా' మీ కోసమే! - How To Become Rich
